«ҚазАгро» 10 жыл мерзімге 1 млрд. доллардың еурооблигацияларын шығарды
АСТАНА. 21 мамыр. ҚазАқпарат - «ҚазАгро» Ұлттық басқарушы холдингі» АҚ 10 жыл мерзімге жылдық үстемақысы 4,6 пайызбен 1 млрд. доллардың еурооблигацияларын шығарды, деп хабарланды «Халықтық IPO» бағдарламасының ресми сайтында.
Бұл компанияның аталмыш борышкерлік бағалы қағаздарды алғаш рет орналастыруы.
Компанияның баспасөз қызметінен хабарлағандай, екі жүзден астам инвесторлардан түскен тапсырыс мөлшері 3,3 млрд. долларды құраған. Бондтардың 35% - Ұлыбритания, 33% - АҚШ, 13% - Қазақстан, 15% - құрлықтық Еуропа инвесторлары сатып алды. Бағалы қағаздар Ирландия және Қазақстан қор биржаларында листингтелді.
«Осы мәміле қазақстандық эмитенттің осыншалық ұзақ айналымдағы қағазына құны бойынша рекордтық төмен дебюттік борышкерлік шығарылымын тіркеді» - делінген баспасөз баянында.
Тартылған қаржы Агроөнеркәсіп саласын дамытудың 2020 жылға дейінгі бағдарламасы аясындағы жобаларды жүзеге асыруға бағытталады.
2011 жылы құрылған «ҚазАгро» компаниясының бірден-бір акционері - Қазақстан Үкіметі.
