«Қазақ батырлары» лондондықтарды таңғалдырды

ЛОНДОН. ҚазАқпарат – Ежелгі жаугергер киімін киіп, қару-жарақтарын асынған қазақ жігіттері Лондон тұрғындарын таңғалдырды, деп хабарлайды ҚазАқпарат тілшісі.

«Қазақ батырлары» лондондықтарды таңғалдырды

Трафальгар алаңына ағылған туристердің назары алаңның ажарын ашып тұрған Адмирал Нельсонның мүсінінен гөрі қазақ батырларына ауысты.

Бойлары 2 метрден асатын жігіттермен олар жарыса суретке түсті. Батырлардың флеш-мобы Елизавета ІІ-ші ханшайымның лондондық ресми резиденциясы алдында жалғасты.

«Мен АҚШ-тың Мичиган штатындағы Детройт қаласынанмын. Бүгін Біріккен Корольдікке келіп, аз-маз бос уақыт табылған соң Букингем сарайына достарымызбен бас сұққанбыз. Біз үшін бұл жәй сәйкестік емес, одан да асқан дүние - батырлармен суретке түсу, олардың шеруін көру, қуанышына ортақтасу. Осы тарихи сәттің бір бөлігі болу мен үшін үлкен бақыт», - дейді туристердің бірі Джон Ликари.

«Орда» этно-жобасы аясында Думан, Бектөре, Елуар және Олжас есімді жігіттер екі жылдан бері қазақтың салт-дәстүрлері мен ұлттық киімдерін әлем елдері арасында насихаттап келеді.

«Бұл жаққа келудегі мақсатымыз ұлттық киімдерімізді шетелдіктерге көрсету, қазақтың көне ғасырлық тарихын таныту. Ежелгі ата-бабаларымыздың жаугершілік заманда киген ұлттық нақыштағы киімдерін насихаттау»- дейді «Орда» этно-жобасы қатысушысы Думан Әмин.