«Қазақ этнографиясы» - қазақ салт-дәстүрінің энциклопедиялық жинағы

АС ТАНА. ҚазАқпарат - Қытай орталық телеарнасы (CCTV) ресми сайтының қазақ тілі нұсқасы жүзеге асырып келе жатқан «Кітап қамбасы» бағдарламасы белгілі қаламгер, ғалым, баспагер, сыншы, ұлтын сүйген ұлағатты азамат Зейнолла Сәніктің шығармашылығы жайлы сыр шертеді. Сондай-ақ, ғалымның баласы Жанат Зейноллақызымен бірлікте құрастырған қазақ салт-дәстүрі мен әдет-ғұрпы жайлы егжей-тегжейлі баяндайтын «Қазақ этнографиясы» атты еңбегі сөз болады, деп хабарлады Baq.kz.

Айта кетейік, Зейнолла Мүбәракұлы Сәнік 1935 жылы Қытайдың Тарбағатай аймағында дүниеге келген. Пекин қаласындағы орталық жастар институтын бітіріп, еңбек жолын баспагерліктен бастаған. Үрімжідегі жастар баспасында жауапты редактор болып қырық жылдай қызмет атқарған. 1955 жылдан бастап әдеби зерттеу жұмыстарын жаза бастаған. Сол уақытта Қытайда жүргізілген «мәдени төңкерістің» ауыр соққысына ұшырап, «халық жауы» болып, ауыр күндерді де өткерген. Соған қарамастан, қаламгердің ғылыми еңбектерінен, роман, повестерінен құралған жиырмадан астам кітабы жарық көрген. Қазақстанда «Қаракерей Қабанбай», «Хас батыр Қабанбай», «Тұғырыл хан», «Демежан батыр», «Халық күйшісі Қайрақбай», «Баспай» атты кітаптары жарияланған. Қадірлі қаламгер 2013 жылдың 26 қыркүйегінде өмірден озды.