Қазақ-корей бірлескен іс-шаралар жоспары жасалады – Вера Ким
АСТАНА. KAZINFORM – Мәжіліс депутаты, Қазақстандағы корейлер қауымдастығының өкілі Вера Ким Қазақстан мен Корея Республикасының мәдени-гуманитарлық байланыстары туралы айтып берді.
«Қазақстан Оңтүстік Кореямен өте достық қарым-қатынаста, бүгінгі күн соның куәсі. Қазір қазақстандық жастар корей телехикаяларын жиі көреді, сондай-ақ корейлік танымал музыканы тыңдайды, яғни К-поп өте танымал. Біз Кореяда денсаулық сақтау, білім беру, машина жасау және бизнестің басқа да салалары ілгері дамыған жүйе екенін білеміз. Қазақстан мен Оңтүстік Кореяның өзара алмасатын көп нәрсе бар», - деді Вера Ким Астанада екі ел Президентінің қатысуымен өткен гала-концерт барысында.
Екіжақты кездесу барысында Мемлекет басшысы Қасым-Жомарт Тоқаев Қазақстанда тұратын корей диаспорасына тілді сақтау мен дамытуда қажетті қолдау көрсетілетінін айтқан еді.
«Білім беру және мәдени іс-шаралар ұйымдастырылады. Бұл бағытта келіссөздер жүргізіліп жатыр. Жақын арада бірлескен іс-шаралар жоспары жасалады», - деді Вера Ким.
Айта кетсек, Мемлекет басшысы Қасым-Жомарт Тоқаев пен Юн Сок Ёль екі ел өнерпаздарының гала-концертін тамашалады.
Сондай-ақ, мәдени шара барысында екі ел президенті «Ұлы дала алтыны» көрмесін аралады.
