Қазақ-қырғыз шекарасында азық-түлік өнімдерін жасырын алып өтпек болған азамат ұсталды
АСТАНА. ҚазАқпарат - Шекара қызметінің «Оңтүстік» өңірлік басқармасы «Тараз» шекара отрядына қарасты «Сыпатай батыр» бақылау-өткізу бекетінің бақылаушылары 49 жастағы Қырғызстан азаматын ұстады. Ол «VOLVO» көлігінің құпия жеріне азық-түлік өнімдерін жасырып, мемлекеттік шекарадан өзінің еліне заңсыз алып өтуге тырысқан.
«Күдіктінің автокөлігін тексеріп қараған кезде, шанағының құпия жеріне жасырылған азық-түлік өнімдері - 12 қап ұн мен 30 шөлмек күнбағыс майы (150 литр) табылды», делінген ҚР ҰҚК Шекара қызметі баспасөз қызметінің хабарламасында.
Аталған азаматқа Қазақстан Республикасы Әкімшілік-құқықтық кодексінің 427-бабы бойынша (Кедендік одақтың мемлекеттік шекарасы арқылы өтетін тауарды кедендік және шекаралық бақылаудан жасыру) айып тағылды.
Тергеу амалдары жүргізілуде.
