Қазақ мемлекеттік циркінің әртістері балалар колониясында өнер көрсетті
АСТАНА.Тамыздың 3-і. ҚазАқпарат /Ғалымжан Хасенов/ - Сейсенбі тамыздың 3-інде Қазақ мемлекеттік циркінің әртістері балалар колониясында өнер көрсетті, деп хабарлады Қылмыстық-атқару жүйесі комитетінің Алматы қаласы бойынша департаментінің баспасөз қызметінен.
Департамент бастығының орынбасары Ирина Якупова, бұл шараның сотталған кәмелетке толмағандардың арасында тәрбие жұмысының тиімділігін арттыру мақсатында өткізіліп отырғанын айтты.
Қайырымдылық концерт Қазақстан Республикасының еңбек сіңірген әртісі, Қазақ мемлекеттік циркінің бас диркторы Қыдырхан Бөлебековтың қолдауымен өтті.
«Колония тәрбиеленушілерінің алдарына аң үйретуші С. Парватов маймылдарымен, жылан арбаушы Владимир Бороденко, акробат Ақбаевтардың отбасы, гимнасшы Дария Сүлейменова және мәздемдер - ағайынды Қамашевтар шыққан кезде, олардың қуанғандарын көрсеңіздер», - дейді И.Якупова.
Мұндай шаралар тек мәдени деңгейді көтеріп қана қоймайды, сонымен бірге режимдік нысандағы оперативті жағдайға да оң әсерін тигізеді, дейді Қылмыстық-атқару жүйесі комитетінің баспасөз қызметіндегілер.
