Қазақ журналистикасының қара нарлары марапатталды
АСТАНА. ҚазАқпарат - Оңтүстік шаһарда Байланыс және ақпарат қызметкерлері күні қарсаңында журналистика саласының майталмандарына «Қазақ журналистикасының қайраткері» атағы тапсырылды.
Жүлдені Қоғамдық атақтар мен марапаттар жөніндегі Республикалық кеңес тағайындады, деп жазады «Айқын» басылымы.
«Мемлекет басшысы Нұрсұлтан Назарбаевтың «Болашаққа бағдар: рухани жаңғыру» атты бағдарламалық ұстанымдары негізінде ұлттық кодты нығайту мен ұлттық сананы өркендету мақсатында әрі Бұқаралық ақпарат құралдары қызметкерлерінің кәсіби мерекесі қарсаңында ұйымдастырылып отыр. Журналистердің ресми мейрамында білікті төртінші билік өкілдеріне қоғамдық негіздегі кәсіби жоғары марапат тапсыруды жөн көрдік»,- деп атап өтті Республикалық кеңестің төрағасы, «Президент және халық» газетінің бас редакторы Марат Тоқашбаев.
«Қазақ журналистикасының қайраткері» атағын төртінші билік ақсақалдары, аға буын өкілдері Сапабек Әсіпұлы, Шерхан Мұртаза, Сарбас Ақтаев, Уахап Қыдырханұлы, Ғаббас Қабышұлы, Зәкір Асабаев, Мамадияр Жақып, Бекболат Әдетов, Файзолла Оразаев, Орысбай Әбілдаев, Нұрмамбет Қизатов, Бейбіт Қойшыбай, Нұрлан Оразалин, Ержұман Смайыл, Жарылқап Бейсенбайұлы, Жанат Елшібеков және Асқанбай Ерғожаев иеленді. Сонымен қатар айтулы марапаттың медалін бүгінгі Бұқаралық ақпарат құралдарының басшылары да кеудесіне тақты. Атап айтсақ, Нағашыбек Қапалбекұлы, Көпен Әмірбек, Жұмабай Шаштайұлы, Несіп Жүнісбаев, Рысбек Сәрсенбай, Мереке Құлкенов, Жанболат Аупбай, Нұртілеу Иманғалиұлы, Қали Сәрсенбай, Сағатбек Медеубекұлы, Нұртөре Жүсіп және тағы басқалары. Сондай-ақ әріптесіміз «ҚазАқпарат» ХАА шығарушы редакторы Ерлан Қожакелдиев те осы марапатқа ие болды.
