Қазақмыс басқару құрылымын түрлендіріп, басшылық құрамы санын қысқартады
АСТАНА. KAZINFORM — «Қазақмыс» корпорациясы» ЖШС-ның басқарма төрағасы Нұрахмет Нуриев Жезқазғанда еңбек ұжымдарымен кездесу барысында корпорацияның басқармасы мен кадрлық саясатында ауқымды реформаның басталғанын мәлім етті.
Өзгерістердің мақсаты – басқару тиімділігін арттыру, жұмысшылардың мәселелерін жедел шешу, өнеркәсіптік қауіпсіздікті, еңбекті қорғауды және әлеуметтік қолдауды жақсарту. Сонымен қатар реформа барлық деңгейдегі ашықтық пен жауапкершілікті арттыруға бағытталған.
Қайта құру аясында екі басқарушылық деңгей жойылады: корпорацияның бас директоры және тау-кен байыту кешенінің бас директоры. Филиал жүйесі де қайта қарастырылады. Бұл шешім қабылдауды жеделдетуі және компания ішіндегі байланысты жақсартуы тиіс.
Кездесу барысында Нұрахмет Нуриев Олег Копытовқа компанияның бас директоры лауазымында атқарған жұмысы үшін алғысын білдіріп, алдағы уақытта сәттілік тіледі. Сондай-ақ ол жаңа орынбасарларын таныстырды: Саят Бәкіров (өндіріс жөніндегі) және Ғалым Нұржанов (геология және даму жөніндегі).
Құрылымдардың түрленуіне қатысты айтар болсақ, ендігі уақытта өндірістік барлық кәсіпорын технологиялық және географиялық қағидат бойынша қайтадан құрылады. Маусымға дейін компанияның құрылымында бес дербес бөлімше жасақталады:
• Нұрқазған тау-кен өндірісі
• Жезқазған тау-кен өндірісі
• Қарағайлы тау-кен өндірісі
• Балқаш тау-кен өндірісі
• Шатыркөл-Жайсан тау-кен өндірісі
Әрбір бөлімшені мәселелерді жедел шешу үшін қажетті өкілеттіктер берілген тәжірибелі басшы басқарады. Басқарудың жаңа жүйесі әрбір бөлімшенің өндірістік, әлеуметтік және еңбек мәселелерін шешудегі дербестігін қамтамасыз ете отырып, шешім қабылдау үдерісін беруге жол ашады.
Жаңа құрылымдардың басшылары көшпелі кезеңде барлық үдерісті қайта құрумен, тиімді өзара іс-қимылды қалыптастырумен және өндірістің үздіксіз жұмысын қамтамасыз етумен айналысады. 1 маусымға дейін бейімдеу кезеңін аяқтап, жаңартылған пішімде жұмысты жолға қою жоспарланған.
Осыған дейін Қазақмыс студенттері замандастарын металлург болуға шақыратыны хабарланды.
