ҚазАқпарат-Анонс: қаңтардың 26-сы мен ақпанның 1-і аралығындағы оқиғалардың күнтізбесі

None

ЕЛБАСЫЕлбасы Нұрсұлтан Назарбаевтың Үндістанға ресми сапары барысында қаңтардың 23-і мен 27-сі аралығында Делиде «Қазақстан-Үндістан» Іскерлік кеңесінің 4-ші отырысы және екі ел кәсіпкерлерінің іскерлік келіссөздері өтеді. Алдағы ақпанның 3-і күні Елбасы Нұрсұлтан Назарбаевтың қатысуымен Берлинде Қазақстанның Германиядағы жылы ашылады. Бұл күні Берлиндегі Үлкен концерт залында Елбасының қатысуымен Қазақстанның Германиядағы жылы салтанатты түрде ашылып, еліміздің өнер шеберлерінің концерті өтеді. ҮКІМЕТҚаңтардың 26-сында Үкімет үйінде кезекті селекторлық кеңес өтеді. Қаңтардың 26-сы күні Шымкентте Премьер-Министрдің орынбасары Өмірзақ Шөкеевтің қатысуымен «Агроөнеркәсіптік кешендегі серіктестік» тақырыбында өңірлік форум өтеді.Бұл форумға сондай-ақ, «Самұрық-Қазына» Ұлттық әл-ауқат қоры» акционерлік қоғамының басқарма төрағасы Қайрат Келімбетовтің, Ауыл шаруашылығы министрі Ақылбек Күрішбаев пен «ҚазАгро» Ұлттық холдингі» АҚ басқармасының төрағасы Асылжан Мамытбековтің қатысуы жоспарланған. Оңтүстік өңірдің агроөнерәсіптік кешенін дамытуды талқылауға Оңтүстік Қазақстан, Жамбыл, Қызылорда облыстарының басшылары шақырылып отыр.Қаңтардың 31-інде («Министрліктер үйі» әкімшілік ғимараты, 7-кіреберіс, 1-қабат, Мәжіліс залы) Қазақстан Республикасының Премьер-Министрі Кәрім Мәсімовтің қатысуымен Экономика және бюджеттік жоспарлау министрлігінің алқа отырысы өтеді. Алқа отырысында министрліктің 2008 жылдағы негізгі қызметі қорытындыланып, 2009 жылы Мминистрліктің алдына қойған негізгі міндеттері қарастырылады.ПАРЛАМЕНТҚаңтардың 26-сында Парламент Мәжілісінде Халықаралық істер, қорғаныс және қауіпсіздік жөніндегі комитетінің төрағасы Нұрбақ Рүстемовтің Түркияның Қазақстандағы Елшісі Атилла Гүнай мырзамен кездесуі өтеді. ҚАЗАҚСТАН ЖӘНЕ ӘЛЕМ2009 жылғы қаңтардың 1-інен бастап Қазақстан Республикасы Еуропадағы қауіпсіздік пен ынтымақтастық жөніндегі ұйымның төрағалары Үштігінің құрамына кірді. ЕҚЫҰ ережелеріне сәйкес Үштікті Ұйымның қазіргі, алдыңғы және кейінгі төрағалары құрайды. Биылғы жылы ЕҚЫҰ Үштігіне Грекия (қазіргі төраға), Финляндия (2008 жылы төрағалық еткен) және Қазақстан (2010 жылғы төраға) қатысады. ҰЛТТЫҚ БАНКҚР Ұлттық Банкінің Басқармасы 2009 жылғы қаңтардың 1-інен бастап Ұлттық Банкінің ресми қайта қаржыландыру жылдық ставкасын 10 пайыз деңгейінде белгілеуге шешім қабылдады.ҚОҒАМ2009 жылғы ақпанның 25-і мен наурыздың 6-сы аралығында Қазақстан Республикасында Ұлттық халық санағы өткізіледі. 2009 жылғы қаңтардың 1-інен бастап Қазақстан Республикасында жаңа Салық және Бюджет кодекстері күшіне енді. АСТАНАҚаңтардың 26-сында Көлік және коммуникация министрлігі ғимаратындағы Ақпараттық-презентациялық орталықта «Қазақстандағы Сыбайлас жемқорлыққа қарсы құқықты орталықтар: жемқорлыққа қарсы күрестің қоғамдық тетіктері» тақырыбына арналған «дөңгелек үстел» отырысы өтеді. Қаңтардың 26-сында Қазынашылық департаментінде Парламент депутаттарының қатысуымен ««Қазынашылық-Клиент» Мемлекеттік мекемелермен электрондық құжаттар айналымы және «Жалақы» модульдерінің таныстырылымы өтеді. Қаңтардың 26-сында Radisson SAS отелінде «Майкрасофт» корпорациясының Аға вице-президенті Орландо Аяланың Қазақстанға ресми сапарына арналған баспасөз мәслихаты өтеді. Қаңтардың 26-сында Астана әкімі И.Тасмағамбетовтың қатысуымен елордадағы №62 мектеп-лицейдің жаңа ғимаратының салтанатты ашылу рәсімі өтеді.АЛМАТЫ Қаңтардың 21-і мен 28-і аралығында «Ленинградтың ерлігі» деректі фильмінің көрсетілімі болады. Бұл қайырымдылық акциясы батыр-қала Ленинградтың құрсаудан босатылғанына 65 жыл толуына орай ұйымдастырылып отыр.Алматыдағы ҚР Мемлекеттік орталық мұражайында қаңтардың 28-інде «Ауғанстан трагедиясы. 20 жылдан кейін» деп аталатын көрме өтеді. Бұл шара Кеңес әскерлерінің Ауғанстан аумағынан шығарылуының 20 жылдығына арналып отыр. Оны Қазақстанның «Жауынгерлік бауырластық» жергілікті соғыстар мен әскери қақтығыстар ардагерлері одағы мен Алматы қаласындағы Ауғанстан соғысы ардагерлері одағы ұйымдастырып отыр. Мақсат - қала тұрғындары мен қонақтарына Ауғанстан соғысының шындығын көрсету. Сондай-ақ саяси мәселелерді шешуде соғыс тығырықтан шығарар жол еместігін жұртшылық санасына сіңіру. Оған Ауғанстан соғысы туралы деректі материалдар, наградалар мен қатысушылардың басқа да жеке заттары қойылады. Алматыда қаңтардың 29-ында «Қазақстанның бұқаралық ақпарат құралдарындағы қазіргі заманғы экономика мәселелері» деп аталатын дөңгелек үстел жиыны өтедіАлматыда қаңтардың 31-і күні кәсіпқой бокстан халықаралық турнир өтеді. Оған Қазақстан, Қырғызстан, Өзбекстан және Ресейдің 14 былғары қолғап шебері қатыспақ. Шараға «Жерсу» корпорациясы демеушілік жасап отыр. АЙМАҚТАРАЛМАТЫ ОБЛЫСЫӘкімдердің жыл сайынғы есеп беру науқаны биыл қаңтардың 28-інде басталып, ақпанның 11-інде аяқталады. Осы екі аптаның ішінде 16 аудан әкімі мен үш қала әкімі былтырғы жыл бойына атқарылған жұмыстары бойынша халық алдында есеп береді. Ал облыс әкімі Серік Үмбетовтың қорытынды есебі ақпанның 11-іне жоспарланып отыр.БАТЫС ҚАЗАҚСТАН ОБЛЫСЫАудан әкімдерінің есебі қаңтардың 19-ында басталды. Қала әкімінің қорытынды кездесуі қаңтардың 30-ына белгіленсе, облыс басшысы ақпанның 12-сінде өңір тұрғындары алдында есеп береді. ПАВЛОДАР ОБЛЫСЫҚалалар мен аудандардың басшылары қаңтардың 19-ы мен ақпанның 1-і аралығында халық алдында есеп беру кездесулерін өткізеді. Облыс әкімі Бақытжан Сағынтаевтың кездесуі ақпанның 6-сында халық өкілдерінің қатысуымен өтетін облыстық мәслихаттың кеңейтілген сессиясында өтеді.ШЫҒЫС ҚАЗАҚСТАН ОБЛЫСЫОблыстың барлық өңірлерінде қаңтардың 12-сінен бастап барлық деңгейдегі әкімдердің халық алдындағы есеп беру жиналыстары басталады. Бірінші кезекте жыл бойына атқарған жұмыстары бойынша селолық және кент округтерінің 255 әкімі есеп береді. Олар барлығы 680 кездесу өткізеді деп күтілуде. Аудандық маңыздағы алты қаланың әкімі өз өңірлерінің тұрғындарымен 22 кездесу өткізеді. Ал қалалар мен аудандардың 19 әкімі өз есеп беру науқандарын қаңтардың 16-сында бастайды. --------------------------------------------------------------------------------------------------ЕЛЕУЛІ ОҚИҒАЛАР, АТАУЛЫ КҮНДЕР, ЕСІМДЕР ҚАҢТАРДЫҢ 26-Ы, ДҮЙСЕНБІ2009 жылғы қаңтардың 26-ы ? 1430 хижра жылының 1-ші Рәбиуль-Аууалі. Рәбиуль-Аууаль айының бірінші күні.Кеденшілердің халықаралық күні. 1983 жылдан бастап атап өтіледі. Бұл мерекені бүкіл әлемде 800 мың адам тойлайды. 1950 жылғы желтоқсанның 15-інде Кедендік ынтымақтастық кеңесін құру туралы конвенцияның негізінде Бүкіләлемдік кеден ұйымы (WCO) құрылды. Бүгінде ұйымға 162 мемлекет мүше.Үндістан Республикасының мемлекеттік мейрамы ? Республика күні (1950). Үндістан ? Оңтүстік Азияда орналасқан мемлекет. Солтүстігінде Ауғанстан, Қытай, Непал және Бутанмен, шығысында Бангладеш және Бирмамен, батысында Пәкістанмен шектеседі. Астанасы ? Нью-Дели. Ақша бірлігі ? үнді рупийі. Қазақстан Республикасы мен Үндістан арасындағы дипломатиялық қарым-қатынас 1992 жылғы ақпанның 23-інде орнатылды. Үндістан Республикасының Қазақстандағы Төтенше және Өкілетті Елшісі ? Ашок Кумар Мукерджи.ЕСТЕ ҚАЛАР ОҚИҒАЛАР85 жыл бұрын (1924) «Ақ жол» газетінде Ж.Аймауытовтың «Әйелді мектепке алыңдар» деген мақаласы жарық көрді.28 жыл бұрын (1981) Мұхтар Әуезов атындағы Қазақ мемлекеттік академиялық драма театрының жаңа ғимаратының ашылу салтанаты өтті. Сәулетшілері - О.Баймырзаев, А.Қайнарбаев, М.Жақсылықов (жоба авторлары 1982 жылы Қазақстанның Мемлекеттік сыйлығына ие болды). 17 жыл бұрын (1992) Мәскеуде Қазақстан Республикасы мен Жапония арасында дипломатиялық қарым-қатынас орнату туралы хат алмасу рәсімі өтті.2 жыл бұрын (2007) Румынияның Бая Маре қаласында бірлескен «Ромалтын» қазақстан-румын компаниясының таныстырылымы өтті. Жаңа компания «Қазақголд» компаниясының британдық «Oxus Gold Plc» компаниясымен бірлесіп Бая Маре өңірінен алтын өндіру кешенін сатып алуының нәтижесінде құрылған. ҚАҢТАРДЫҢ 27-І, СЕЙСЕНБІХолокост құрбандарын еске алудың халықаралық күні. 1945 жылы қаңтардың 27-сінде Освенцим концлагері тұтқындары азат етілген бұл күнді бірқатар елдер атап өтеді. Освенцим концлагері саяси тұтқындар үшін 1940 жылы салынды. Темір жол торабына жақын орналасқан лагерьде 40-қа жуық түрлі нысан ? барактар, газ камералары, крематорийлар мен адамдарға тәжірибе жүргізілетін зертханалар болды. Күн сайын мұнда мыңдаған адам тиелген бірнеше эшалон келетін. Оларды жою үшін нацистер Циклон-Б улы газын ойлап тапты. Бұл газ алғаш рет бірнеше жүз кеңестік әскери тұтқындарға сыналды. Освенцим «ажал фабрикасы» деген атқа кездейсоқ ие болған жоқ. Лагерь жұмыс істеген 5 жылдың ішінде мұнда 28 ұлттың 1,5 миллион адамы қаза болды. 1979 жылы ЮНЕСКО концлагерьді халықаралық маңыздағы ескерткіштер тізіміне енгізді.Нацизм құрбандарын еске алудың халықаралық күні. 1945 жылғы қаңтардың 27-індегі Освенцим лагерлер тобы тұтқындарының азаттық алған күніне орай бірқатар елдерде атап өтіледі.ЕСТЕ ҚАЛАР ОҚИҒАЛАР17 жыл бұрын (1992) Өскемендегі мыс-қорғасын комбинатында салмағы 10,5 килә Қазақстанның тұңғыш алтын кесегі өндірілді.3 жыл бұрын (2006) «Қазпошта» акционерлік қоғамы Әубәкір Ысмайыловтың шығармашылығына арналған «Бейнелеу өнері» сериясының пошта маркасын айналымға енгізді. Маркада суретшінің 1928 жылы салған Абай портреті бейнеленген. Соңғы 10 жыл төңірегінде Г.Ысмайлованың «Қыз-Жібек», С.Калмыковтың «Фантастикалық натюрморт», Х.Наурызбаевтың «Шопан портреті», Ж.Шәрденовтың «Биік таулар», М.Кенбаевтың «Асауға құрық салу», А.Ғалымбаеваның «Кеседегі қымыз», С.Айтбаевтың «Бақыт» сияқты туындылары «Бейнелеу өнері» сериясымен пошта маркаларында бейнеленген болатын. ЕСІМДЕР65 жыл бұрын (1944) ақын УЛЬМЕР Эльза Альбертовна дүниеге келді. Алматы облысында туған. Алматы педагогикалық шет тілдер институтын бітірген. Қазақ радиосында неміс тіліндегі хабарлар редакциясының меңгерушісі, «Фройндшафт» газетінің меншікті тілшісі, «Нойес лебен» газетінің тілшісі болып істеген. Оның туындылары «Мой Казахстан», «Далекие журавли», «Близкие дали» атты жалпы жинақтарға, «Қазақстан» баспасы шығарған неміс жазушыларының үш томдық антологиясына енген.55 жыл бұрын (1954) философия ғылымының кандидаты, саясаттану ғылымының докторы, профессор ИБАТОВА Ләйлә Мырзәліқызы дүниеге келді. Қостанай қаласында туған. Қазақ мемлекеттік университетін (қазіргі Әл-Фараби атындағы Қазақ ұлттық университеті ) бітірген. 1986 жылдан Қазақ мемлекеттік университетінің (қазіргі Әл-Фараби атындағы Қазақ ұлттық университеті) аспиранты, оқытушысы, аға оқытушысы, доценті, докторанты, профессоры, саясаттану кафедрасының меңгерушісі қызметтерін атқарған. Ғалымның бір кітабы және 50-ден астам ғылыми жарияланымы бар. ҚАҢТАРДЫҢ 28-І, СӘРСЕНБІЯдролық қаруға қарсы жұмылудың халықаралық күні. 1985 жылы Үндістан, Аргентина, Грекия, Мексика, Танзания және Швецияның мемлекет және үкімет басшыларының Делиде өткен кездесуінде Дели декларациясы қабылданды. Онда ядролық қаруы бар ірі мемлекеттерді, басқа да елдердің парламенттері мен үкіметтерін ядролық қаруды көбейту ісіне қарсылық білдіруге шақырды.ЕСТЕ ҚАЛАР ОҚИҒАЛАР17 жыл бұрын (1992) Қазақстан Республикасы мен Корей Республикасы арасында дипломатиялық қарым-қатынас орнату туралы хаттамаға қол қойылды.17 жыл бұрын (1992) Қазақстан Республикасы мен Корей Халықтық Демократиялық Республикасы арасында дипломатиялық қарым-қатынас орнату туралы біріккен мәлімдемеге қол қойылды.16 жыл бұрын (1993) ҚР Жоғарғы Кеңесі тәуелсіз Қазақстан Республикасының тұңғыш Конституциясын қабылдады.15 жыл бұрын (1994) «Түркістан» апталық газетінің алғашқы саны жарық көрді.15 жыл бұрын (1994) Шығыс Қазақстан облысының Абай ауданында Абай Құнанбайұлының шәкірті, ақын Көкбай Жанатайұлы атындағы қор ашылды.235 жыл бұрын (1774) II Екатеринаның Жайық өзенінің атауын Орал өзені деп өзгерту туралы арнаулы жарлығы шықты. Жайық атауын енді ешқашан естімеуді мақсат еткен әйел патшаның бұл шешімі Е.Пугачев көтерілісін қолдаған Жайық казактарына, сондай-ақ оларға ішінара қосылып кеткен қазақтарға жасаған қысастығы болатын. ЕСІМДЕР40 жыл бұрын (1969) «Самұрық-Қазына» ұлттық әл-ауқат қоры» басқармасының төрағасы, Дж.Манн атындағы халықаралық сыйлықтың лауреаты КЕЛІМБЕТОВ Қайрат Нематұлы дүниеге келді. Алматы қаласында туған. М.Ломоносов атындағы Мәскеу мемлекеттік университетін, Қазақ мемлекеттік басқару академиясы жанындағы Нарық институтын, Джорджтаун университетінің (АҚШ, Вашингтон) арнаулы бағдарламасын бітірген. 1996-1997 жылдары ? Қазақстан Республикасы Президенті жанындағы Жоғары экономикалық кеңес хатшылығының аға сарапшысы, Қазақстан Республикасы Стратегиялық жоспарлау агенттігінің департамент директорының орынбасары, директоры. 1997-1998 жылдары ? Қазақстан Республикасы Стратегиялық жоспарлау және реформа агенттігінің департамент директорының орынбасары. 1998-1999 жылдары ? Қазақстан Республикасы Президенті Әкімшілігінің бөлім меңгерушісі. 1999-2001 жылдары ? Қазақстан Республикасы Стратегиялық жоспарлау агенттігінің төрағасы, Қазақстан Республикасының бірінші қаржы вице-министрі. 2001-2002 жылдары ? «ДВК» республикалық қоғамдық бірлестігі саяси кеңесінің мүшесі, Қазақстан Республикасының бірінші қаржы вице-министрі. 2002-2006 жылдары ? Қазақстан Республикасының Экономика және бюджеттік жоспарлау министрі. 2006-2008 жылдары ? «Қазына» орнықты даму қоры» акционерлік қоғамының басқарма төрағасы. 2008 жылы қаңтардың 23-інде Мемлекет басшысының Жарлығымен Қазақстан Республикасы Президенті Әкімшілігінің Басшысы болып тағайындалды. Қазіргі қызметінде 2008 жылғы қазанның 13-інен бастап істейді. «Құрмет» орденімен, медальдармен марапатталған. ҚАҢТАРДЫҢ 29-Ы, БЕЙСЕНБІЕСТЕ ҚАЛАР ОҚИҒАЛАР75 жыл бұрын (1934) Шымкент қорғасын зауыты іске қосылды. Қазір осы зауыт ТМД елдері бойынша қорғасын қалдықтарын өңдеу ісімен айналысатын ең ірі кәсіпорын болып есептеледі.17 жыл бұрын (1992) Қазақстан Республикасы мен Иран Ислам Республикасы арасында дипломатиялық қарым-қатынас орнату туралы хаттамаға қол қойылды.16 жыл бұрын (1993) Швейцарияның Давос қаласында Бүкілдүниежүзілік экономикалық форум өтті. Оған Елбасы Н.Ә.Назарбаев қатысып, «Бритиш» және «Аджип» компаниялары Қазақстандағы ірі Қарашығанақ мұнай-газ кен орнын игеруге жарияланған тендерді ұтып алғанын хабарлады. 11 жыл бұрын (1998) «Байқоңыр» ғарыш айлағынан Талғат Мұсабаев бастаған халықаралық экипаж ғарышқа аттанды.ЕСІМДЕР135 жыл бұрын (1874-1960) Рокфеллер империясының негізін қалаушы, мұнай кәсіпкері РОКФЕЛЛЕР Джон дүниеге келді. ҚАҢТАРДЫҢ 30-Ы, ЖҰМАЕСТЕ ҚАЛАР ОҚИҒАЛАР17 жыл бұрын (1993) Қазақстан Республикасы Еуропадағы қауіпсіздік және ынтымақтастық ұйымына кірді.3 жыл бұрын (2006) Астанада Марат Азбанбаевтың «Менің Қазақстаным - Жұмекен» атты кітабының таныстырылымы өтті.3 жыл бұрын (2006) «Ана тілі» баспасынан Кеңес одағының Батыры, КСРО Педагогика ғылымдары академиясының академигі, қазақ ауыз әдебиетін зерттеуші Мәлік Ғабдуллиннің «Алтын жұлдыз» атты естелік кітабы жарық көрді. Бұл жинаққа қаһарман ғалымның әскери шығармалары топтастырылған. Аталған жинақты құрастырып, алғы сөзін жазған - филология ғылымдарының докторы, профессор Серік Негимов. Сонымен қатар осы баспадан Серік Негимовтың «Қазақтың сал-серілері» атты жаңа кітабы оқырмандармен қауышты. Ғалымның аталған зерттеу еңбегіне Сегіз сері, Ақан сері, Біржан сал сынды қазақтың белгілі тұлғаларының өмірі мен шығармалары енгізілген.2 жыл бұрын (2007) Мәскеу монета сарайы қасиетті Құран кітабын алтыннан жасап шығарды. Коммерциялық фирмалардың бірінің тапсырысы бойынша дайындалған мұсылмандардың басты кітабының мұндай данасының бірінші иегері Ресей президенті Владимир Путин болды. Алтын Құранның нақты бағасы жария етілмеген. Тек «бірнеше ондаған миллион рубль» туралы сөз болғаны белгілі. Кітапты жасауға 14 килә 999-шы сынамалы алтын жұмсалған. Құранда араб қарпімен жазылған 163 алтын парақ бар. Олардың биіктігі - 14 см, ені - 10 см. Кітаптың басылуын «Әлемдік саяхат» жарнама фирмасының осы жоба үшін арнайы құрылған еншілес кәсіпорны қаржыландырған. Басылымға қасиетті кітаптың VIII ғасырда жазылған көне қолжазбасы түпнұсқа ретінде алынған. Қасиетті кітаптың 10 көшірмесін жасау көзделген. Олардың барлығы ислам негізгі дін болып табылатын мемлекеттердің басшыларына сыйға тартылады.ЕСІМДЕР95 жыл бұрын (1914-1937) жазушы ЕРУБАЕВ Саттар дүниеге келді. Оңтүстік Қазақстан облысының Түркістан ауданында туған. Алдымен ауыл молдасынан ескіше сауат ашқан. Түркістан жетіжылдық мектебін бітіріп, сонда аудандық комсомол комитетінде біраз уақыт қызмет істеген. Алматыдағы жоғары оқу орындарына түсуге даярлайтын арнайы курсты, Ленинградтың тарих-философия-лингвистика институтын бітірген. 1933 жылы «Орыс неоромантизмі және қазақтың ұлттық әдебиеті» деген тақырыпта диплом қорғап, аспирантурада қалдырылды. Бірақ Қазақстан өлкелік комсомол комитетінің арнайы шақыртқан телеграммасымен елге оралды. Алдымен «Ленинская смена», кейіннен «Лениншіл жас» газетінде әдебиет бөлімінің меңгерушісі қызметін атқарды. Мұнымен қатар Алматыдағы жоғары ауыл шаруашылығы мектебінің философия кафедрасында ассистент болып, лекция оқыды. Біраз уақыт «Лениншіл жас», «Қарағанды пролетариаты» газеттерінде жауапты редактордың орынбасары болды. Өзінің болашақ романы ? «Менің құрдастарымның» материалын осы кезеңде дәл осы жердегі өмірден жинақтаған. Ол Қазақстан жазушылары одағының I съезіне делегат болып қатысып, одақтың мүшелігіне алғаш қабылданғандардың бірі. 1935 жылы Алматыға оралып, Ленинград университетінің аспирантурасына түсуге дайындалды. Бірақ меңдеп кеткен ауруы оның оқуына еркіндік бермеді. Қазақ педагогикалық институтының қазақ әдебиеті кафедрасына доцент боп орналасып, әдебиет тарихы мен теориясынан дәріс оқыды. Осы кезде «Менің құрдастарымды» жазып жүрді. Толық аяқтап үлгермегенмен, «Менің құрдастарым» романымен, көркем әңгіме, новеллаларымен прозашы ретінде, суреттеме-очерк, мақалалары арқылы - публицист, өлең-жыр, балладалары, эпиграмма, пародиялары арқылы ақын ретінде ол туған әдебиеті тарихынан өз орнын алды. 1966 жылы «Менің құрдастарым» романы үшін Қазақстан Ленин комсомолы сыйлығы берілді.95 жыл бұрын (1914-1986) кинооператор, кинорежиссер, Қазақстанның еңбек сіңірген өнер қайраткері БЕРКОВИЧ Марк Исаакович дүниеге келді. Бүкілодақтық кинематография институтын бітірген. 1937-1956 жылдары «Мосфильм» және «Моснаучфильм», ал 1956-1986 жылдары «Қазахфильм» студияларында қызмет етті. Шәкен Аймановпен шығармашылық бірлікте болып, ол қойған «Біз осында тұрамыз», «Біздің сүйікті дәрігер», «Бір ауданда», «Әнші ауыл», «Алдаркөсе», «Тақиялы періште», «Найзатас баурайында» фильмдерін, сондай-ақ «Асау Ертіс жағасында», «Ән қанаты» атты көркем фильмдерді түсірді. Ол «Бес жылдан кейін», «Мұқанның қайта тууы», «Алматы», «Алғашқы гүлдер», «Жаңа жылыңызбен», «Шәкен Айманов», «Түсті металургия», «Жаңа алаң» тағы басқа ғылыми-көпшілік және хроникалық-деректі ленталардың түсірушісі және қоюшысы болды. «Аяқталмаған өмір киноленталары» атты естелік кітабы жарық көрген. 2-ші дәрежелі «Отан соғысы» орденімен және медальдармен марапатталған. ҚАҢТАРДЫҢ 31-І, СЕНБІЕСТЕ ҚАЛАР ОҚИҒАЛАР13 жыл бұрын (1996) Қазақстанның екі палаталы тұңғыш Парламентінің алғашқы сессиясы Сенат пен Мәжіліс депутаттарының бірлескен отырысымен басталды.3 жыл бұрын (2006) Павлодарлық зейнеткер Мұрат Якубов араб-орыс-қазақ сөздігін құрастырып шықты. Онда үш тілдегі түсіндірмесі, жіктелген және тәуелденген формадағы түрлері берілген 20 мыңдай сөз бар. М.Якубовтың еңбегі 900 жазба беттен тұрады. Автордың айтуынша, бұған дейін мұндай сөздіктер басып шығарылмаған. 3 жыл бұрын (2006) Қазақстан бойынша алғашқы несиелік бюро құрылды. Америкалық «Creditinfo Group» компаниясының ұйытқы болуымен құрылған бұл бюро құрамына Қазақстандағы «Альянс» банкі», «АТФ Банкі», «ТұранӘлем Банкі», «ЦентрКредит Банкі», «Қазкоммерцбанк», «Қазақстанның Халық Банкі» мен «Цесна» банкі» акционерлік қоғамы секілді ең ірі қаржы институттары кіреді.2 жыл бұрын (2007) Берлинде (Германия) Нұрсұлтан Назарбаевтың «Еуразия жүрегінде» деп аталатын кітабының таныстырылымы өтті.2 жыл бұрын (2007) Алматыда кешенді ғылыми-техникалық «Қазақстан Республикасының Ұлттық атласы» және «Қазақстан Республикасы» атты монография жарыққа шықты. Аталмыш еңбектердің әрқайсысы 3 томнан тұрады. Атластың 1-ші томы табиғи-ресурстық ахуалға арналған. Оған еліміздің жағрафиялық орны, бедері, геологиялық құрылысы, минералдық ресурстары, климаты, жерасты және жербеті сулары, топырақтары, жер ресурстары, жануарлар мен өсімдіктер дүниесі, ландшафтары мен физикалық-жағрафиялық ерекшеліктері қамтылған. Онда 116 карта жарияланған. Атластың әлеуметтік-экономикалық ахуалға арналған 2-ші томында еліміздің халқы, әлеуметтік саласы, туристік орындары, ауыл шаруашылығы, аумақтардың әлеуметтік-экономикалық саласы, сыртқы экономикалық байланыстар, тарихы және археологиясына қатысты 116 карта берілген. Ұлттық атластың 3-ші томынан еліміздің табиғи-шаруашылық жүйелерінің экологиялық жағдайына арналған 89 картамен танысуға болады. Ал «Қазақстан Республикасы» монографиясының Табиғи жағдайлары мен ресурстары» деп аталатын 1-ші томында еліміздің литосферасы, гидросферасы, атмосферасы және биосферасы туралы айтылады. «Әлеуметтік-экономикалық дамуы» деп аталатын 2-ші томда еліміз өз конституциясын қабылдағаннан кейінгі әлеуметтік-экономикалық жағрафиясы сипатталса, «Қоршаған орта және экология» деп аталатын 3-ші томда экологиялық ахуалдың жай-күйі қамтылып отыр.295 жыл бұрын (1714) Ресейдегі алғашқы мұражай ? Кунсткамера ашылды. Мұражай коллекцияларының алғашқы тобын I Петрдің шет елге барған сапарынан алып келген кеме, машина, астрономиялық құрал-жабдық үлгілері мен аң-құстардың тұлыптары құрады. Мұражай 1719 жылы көпшілік үшін есігін айқара ашты. Көрермен тарту үшін мұражайға келген әрбір адамға бір кесе кофе немесе арақ берілді. Бұл қонақжайлық үшін мемлекет қазынасынан 400 рубль бөлініп тұрды.ЕСІМДЕР65 жыл бұрын (1944) экономика ғылымының докторы, профессор ЖАТҚАНБАЕВ Ержан Байғожаұлы дүниеге келді. Алматы облысының Талғар ауданында туған. М.Ломоносов атындағы Мәскеу мемлекеттік университетін және аспирантурасын бітірген. 1968-1984 жылдары Қазақстан Жоғары оқу орындары министрлігінде, Алматы халық шаруашылығы институтында қызмет істеген. 1984 жылдан Қазақ мемлекеттік университетінде ғылыми-педагогикалық жұмыстармен айналысады. Негізгі еңбектері аралас экономика, мемлекет және нарық мәселелерін зерттеуге арналған. 4 ғылыми кандидаттарын даярлаған, 70-тен аса еңбектің авторы.