Қазақстан 2011 жылы жемістер мен көкөністерді сатып алуға 13 млрд. теңгеден кем емес сома жұмсауды көздеп отыр
АСТАНА. 25 тамыз. ҚазАқпарат /Гүлмира Алякпарова/ - 2011 жылы ел Үкіметі жеміс-жидектерді сатып алуға 3,3 миллиард, ал көкөністерге 9,7 миллиард теңгеден кем емес сома жұмсауды көздеп отыр. Бұл туралы www.goszakup.gov.kz веб-порталына сілтеме жасап «Электронды коммерция орталығы» ЖШС-ның баспасөз қызметі хабарлады.
«Күз айларының жақындауымен жүргізілген жылсайынғы талдаудың нәтижесіне сүйеніп, көкөністерді сатып алулардың арасында бірінші орында әдеттегідей, картоп (5,7 млрд. теңге) тұрғанын атап өте аламыз. Ал жеміс-жидектердің арасында алмалар (1,3 млрд. теңге) тұр. Жалпы алғанда, мемлекет 2011 жылы көкөністерді сатып алуға 9,7 млрд., ал жеміс-жидектерге 3,3 млрд. теңгеден кем емес қаражат жұмсауды жоспарлап отыр», - деп атап өтті «Электронды коммерциялар орталығы» ЖШС-ның басқарма бастығы Сұлтанқажы Ахметов.
Электронды түрде мемлекеттік сатып алуларды өткізу алаңы - ҚР Қаржы министрлігінің тапсырысы бойынша Электронды коммерциялар орталығы әзірлеген - веб-портал болады. Қазақстандық портал мемлекеттік сатып алуларды өткізу үшін ғана емес, тауарларды жеткізушілер, сатып алушылар және өткізілетін келісімдер туралы ақпараттарды орналыстыруға арналған.
ҚР мемлекеттік сатып алулар веб-порталын қолданушылардың саны күн өткен сайын артып, тіркелген пайдаланушылардың саны бүгін 106 мыңға жетті. Порталда барлығы 7 млн. лот және 2,3 млн.-нан астам хабарландыру жарияланды. Соңғы айда порталда 1,4 млн.-нан астам келуші тіркелді. Олардың денін қазақстандықтар құрағанымен, олардың арасында көрші елдердің кәсіпкерлері де аз емес. Мәселен, шілде айында Ресей Федерациясынан 18 мың, Украинадан 3 мың келуші тіркелді. Сондай-ақ порталға Қытай, АҚШ, Германия және Үндістан елдерінің өкілдері де қызығушылық танытуда.
