Қазақстан астығы қайда экспортталады?

АСТАНА. KAZINFORM – Қазақстанның астық экспортындағы позициясы ілгерілеп келеді. Сала өткен жылы рекордтық деңгейге жетті. Желтоқсан айында миллион тоннаға жуық астық шетел асса, жыл бойы 7,9 млн тонна өнім экспортталған.

ҚР Ауыл шаруашылығы министрлігінің мәліметінше, 2024 жылдың қыркүйек айы мен 2025 жылдың наурыз айы аралығында экспортқа 6,4 млн тонна астық жөнелтілген. Басым дені Өзбекстан мен Тәжікстанға тасымалданыпты.

– Жаңа егіннің астық экспортының өсуі байқалады. Өзбекстанға – 31,7% (1,8 млн тоннадан 2,4 млн тоннаға дейін), Тәжікстанға – 50% (633 мың тоннадан 954 мың тоннаға дейін), Ауғанстанға – 40% (192 мың тоннадан 261 мың тоннаға дейін), Қырғызстанға - 88%-ға (78 мың тоннадан 147 мың тоннаға дейін) дейін артты, – делінген министрлік мәліметінде.

Айта кету керек, Иран мен Әзербайжанға да қазақстандық астық жеткізілімі ұлғайды. Кейінгі жылы Иранға – 17,6 есе, Әзірбайжанға – 84 есе артық экспорт жасалған.

Бұған дейін әлемдік астық экспортының отандық нарыққа қалай әсер ететінін талдаған едік.