Қазақстан азаматтары шетелдегі 65 сайлау учаскесінде Мәжіліс пен мәслихат депутаттарына дауыс бере алады
АСТАНА. ҚазАқпарат - Қазақстан азаматтары шетелдегі 65 сайлау учаскесінде Мәжіліс пен мәслихат депутаттарына дауыс бере алады. Бұл туралы бүгін ҚР Орталық сайлау комиссиясының хатшысы Бақыт Мелдешов мәлім етті.
«Бізде шет мемлекеттерде небәрі 65 сайлау учаскесі бар. Мәселен, Ресейде, 3-4, АҚШ-та 1-2 және қалған мемлекеттерде бір-бірден учаскеміз тіркелген. Сол елдерде болған Қазақстан азаматтарына жеке төлқұжаттарымен дауыс берсе болады», - деді Б.Мелдешов.
Дегенмен ҚР ОСК хатшысы Қазақстан азаматтары кез келген шет мемлекетте дауыс бере алмайтындығын атап өтті.
«Дауыс беру құқығын беретін есептен шығару куәлігі тек Қазақстан ішінде ғана беріледі. Шетелде жүрген азаматтар сол елде ашылған сайлау учаскесіне келіп, төлқұжаты арқылы дауыс бере алады. Бұл ретте дауыс беру құқығын беретін есептен шығару куәлігі қажеті жоқ», - деді ол.
Айта кетейік, бүгін ҚР Орталық сайлау комиссиясының 2009 жылғы 8 ақпандағы №161/306 қаулысымен бекітілген дауыс беру құқығын беретін есептен шығару куәліктерін беру және есепке алу қағидаларына бірқатар өзгерістер енгізілді. «Атап айтқанда, аталған қағидалардан 7-тармақ алынып тасталды. Ал 8-тармақ жаңа редакцияда жазылды. Оған сәйкес есептен шығару куәлігі бір елді мекеннің шегіндегі басқа сайлау округінде немесе басқа сайлау учаскесінде дауыс беруге қатысқысы келетін сайлаушыларға берілмейді.
