Қазақстан азаматтары жаппай гимнастикаға шығады
АСТАНА. 5 қыркүйек. ҚазАқпарат - Алдағы сенбі, қыркүйектің 7-сі күні республика бойынша Денсаулық фестивалі өтеді.
Биылғы фестивальдің ұраны - «Денсаулығым керемет - жаттығуға көп рахмет!». Осыған орай, республика бойынша жаппай гимнастика жаттығуларын ұйымдастыру жоспарланған. Ол үшін таңертең бір уақытта радио желі арқылы кешенді жаттығулар мен оларды орындау тәртібі таратылады. Осы кезде барлық стадиондар мен спорт алаңдарында сан алуан іс-шаралар - «Анам, әкем және мен - спортшы отбасымыз!», «Қол жеткіземіз көпке - болсақ біз бірге!», ұрпақтар эстафетасы, памперспен жүгіру сияқты «көңілді старттар», көрмелер, викториналар және байқаулар өтеді. Сондай-ақ сұлулық пен денсаулыққа арналған тауарлар, спорт әдебиеттері мен дұрыс тамақтану өнімдерінің жәрмеңкелері ұйымдастырылмақ.
