«Қазақстан Барысы-2024»: Ең ауыр, ең жеңіл, ең жас, ең жасы үлкен балуан кім
АСТАНА. KAZINFORM – Астана қаласында Республика күніне орай қазақ күресінен өтіп жатқан «Қазақстан барысы-2024» республикалық турниріне қатысып жатқан балуандар арасындағы ең ауыр, ең жеңіл, ең жас, ең жасы үлкен балуандарды назарларыңызға ұсына кеткенді жөн санап отырмыз.
Бүгінгі додаға қатысып жатқан балуандардың арасында жасы ең кішісі – Солтүстік Қазақстан облысының балуаны Әділет Мурзаш. Ол 2006 жылы дүниеге келген. Оның салмағы 127 келі болса, бойы - 180 см.
Ал жасы ең үлкені – астаналық балуан Олжас Шынкеев. Ол 1992 жылы 12 сәуірде дүниеге келген. Салмағы – 119 келі болса, бойы – 178 см.
«Қазақстан барысы-2024» республикалық турнирінде бақ сынап жатқан балуандардың арасындағы салмағы ең жеңілі - Алматы қаласының балуаны Әбдіқасым Сахан мен Ақтөбе облысының балуаны Азат Қуанов. Екеуінің де салмағы 90 келі. Ал осы турнирдегі ең ауыр салмақтағы балуан Маңғыстау облысының балуаны Нұрдәулет Жарылғапов. Оның салмағы – 160 келі.
Сонымен қатар аталған турнирде бақ сынап жатқан балуандардың арасында бойы ең ұзыны Алматы облысының балуаны Мәди Еділбаев. Оның бойының биіктігі – 195 см, ал ең аласа балуан Ұлытау облысынан келген Айдос Ғалымов. Оның бойы – 174 см.
Естеріңізге сала кетейік, осыған дейін Астана төріндегі «Барыс Арена» стадионында «Қазақстан Барысы-2024» республикалық турнирі басталғанын жазған болатынбыз.
Турнирге барлығы 42 балуан қатысып жатыр. Турнир қорытындысы бойынша Қазақстанның ең мықты балуаны анықталып, 15 миллион теңгеге ие болады.
