Қазақстан Елшісі Үндістан Президентіне сенім грамоталарын табыстады
НЬЮ-ДЕЛИ. ҚазАқпарат – Бүгін «Раштрапати Бхаван» Президенттік сарайында Қазақстан Республикасының Үндістан Республикасындағы Елшісі Ерлан Әлімбаев аталмыш елдің басшысы Рам Натх Ковиндке сенім грамоталарын табыстады, деп хабарлайды ҚазАқпарат.
«Іс-шарадан кейінгі кездесу барысында Президент Р.Ковинд Қазақстан өкілі рәсімді хинди тілінде өткізгені үшін ризашылығын білдірді. Сондай-ақ дипломатиялық миссиясының басталуымен құттықтай отырып, екі ел арасында қалыптасқан қарым-қатынастардың сенімді сипатын атап өтті», - деп мәлім етті ҚР Сыртқы істер министрлігінен.
Елші Е.Әлімбаев Үндістан Президентін ҚР Президенті Қасым-Жомарт Тоқаевтың алғашқы Жолдауында айтылған ел экономикасын жаңғырту және әлеуметтік саланы жақсарту бойынша Қазақстанда жүзеге асырылып жатқан шаралар туралы хабардар етті.
Сонымен қатар, тараптар бірқатар өзекті мәселелерді, соның ішінде сауда-экономикалық және инвестициялық ынтымақтастық, мәдени-гуманитарлық ықпалдастық жөнінде пікір алмасты.
