Қазақстан ЭЫДҰ аясындағы бәсекеге қабілеттілік бағдарламасын 2024 жылға дейін ұзартуға ниетті - Премьер

НҰР-СҰЛТАН. ҚазАқпарат - Үкіметте Экономикалық ынтымақтастық және даму ұйымымен өзара іс-қимыл жөніндегі кеңес отырысы өтті, деп хабарлайды ҚазАқпарат Үкіметтің ресми сайтына сілтеме жасап.

ЭЫДҰ-мен тиімді ынтымақтастықты жалғастыру үшін Қазақстанның Еуразиялық бәсекеге қабілеттілік бағдарламасына қатысуы туралы келісімнің қолданылу мерзімін 2024 жылғы 1 қаңтарға дейін ұзарту қажет.

Бағдарлама инвестициялар тарту, Еуразияда бәсекеге қабілеттілікті арттыру және жеке кәсіпкерлікті дамыту мақсатында іске асырылады.

Премьер-Министр ЭЫДҰ-мен ынтымақтастықтың аталған бағыттарын мақұлдады.

Бұл ретте Әлихан Смайылов Қазақстан үшін маңызды емес шығындарды алып тастау үшін бірқатар жекелеген тармақты орындаудың орындылығын тағы бір пысықтауды тапсырды.

«Бүгін айтылған мәселелердің маңызы зор. ЭЫДҰ ұсынымдарын жүзеге асыру және стандарттарын енгізу – Ұйымға қосылумен қатар, Қазақстан азаматтарының әл-ауқатын жақсартудың да негізгі қадамы», — деп атап өтті Үкімет басшысы.