Қазақстан халықаралық ұйымдарға төрағалыққа дайын - Мирас Жиенбаев
АСТАНА. KAZINFORM - 2024 жылы жаһандық сайлау циклінің басталуы жаңа тарихтағы әлемдік саясаттың орталық элементі болады. Мұндай жағдайларда көпір құруға бағытталған дипломатиялық процестердің маңыздылығы арта түседі. Ал Қазақстан бір мезгілде бірнеше іргелі маңызды халықаралық ұйымдарға төрағалық ету кезеңіне аяқ басып отыр. Бұл қазақстандық дипломатияның ерекшелігіне айналады.
Бұл туралы Президент жанындағы Қазақстан стратегиялық зерттеулер институтының еуропалық және америкалық зерттеулер бөлімінің жетекші сарапшысы Мирас Жиенбаев Kazinform тілшісіне берген сұхбатында айтты.
Оның сөзінше, биыл Қазақстан бірқатар халықаралық ұйымға төрағалық етеді.
«Біздің дипломатияның тарихы халықаралық құқыққа және көпжақты ынтымақтастықты институционализациялауға адалдығымызды көрсетеді. Астана мәдени-гуманитарлық ынтымақтастық аспектілерінен бастап қауіпсіздік мәселелеріне дейінгі тақырыптардың кең ауқымы бойынша тең құқылы диалог пен сындарлы өзара іс-қимыл үшін кеңістік құрды», – деді Мирас Жиенбаев еліміздің халықаралық ұйымдарға төрағалығының маңызына тоқталып.
Сарапшының айтуынша, Қазақстан бүгінде жаһандық басқару жүйесінің негізін құрайтын халықаралық ұйымдардың маңызды кешенінің мүшесі ғана емес, сонымен қатар көптеген өңірлік және халықаралық бастамалардың бастамашысы саналады.
«Сондықтан да Қазақстанның Шанхай ынтымақтастық ұйымы, Ұжымдық қауіпсіздік шарты ұйымы, Азиядағы өзара іс-қимыл және сенім шаралары жөніндегі кеңес, Түркі мемлекеттері ұйымы, Аралды құтқару халықаралық қоры, Азық-түлік қауіпсіздігі жөніндегі Ислам ұйымына төрағалығы біздің дипломатиямыздың сапалы жаңа деңгейге өтуі үшін шын мәнінде маңызды мүмкіндігі, – деді маман.
Сондай-ақ, оның сөзінше, Қазақстан әлемдік аренадағы ең серпінді «орта мемлекеттердің» бірі ретінде тұрақтылықты сақтау мақсатында халықаралық ынтымақтастықтың неғұрлым тиімді негіздерін құруды іздестіруге елеулі үлес қоса алады.
«Біздің еліміз Қазақстанның халықаралық ұйымдардағы төрағалығы әлеуетінің синергетикасын қамтамасыз етуді басшылыққа алады, оның табыстылығы жалпы бүгінгі және болашақ мәселелері бойынша диалогтан ұтымды әрекеттерге көшу үшін жүйелі мәнге ие болады. Дипломатиялық дәстүріміздің елеулі оң тәжірибесін пайдалана отырып, Астана екіге бөлінген әлемдегі дипломатияның ең белсенді астаналарының бірі ретіндегі позициясын нығайтып келеді. Сонымен қатар, геосаяси шиеленістердің күшеюі жағдайында конструктивті бейбіт диалог пен дипломатияны қолдау кеңістігін кеңейтеді, – деп түйіндеді Мирас Жиенбаев.
