Қазақстан халқы Ассамблеясы ел азаматтарын индустрияландыру жобаларында біріктірмек
«Елімізде жүріп жатқан индустрияландыру саясатына әрбір Қазақстан азаматын жұмылдыру маңызды. Нақты осындай істің барысына барша елдің бірлігін ұйымдастыруға болады. Сондықтан осындай мақсатқа негізделе отырып, бірнеше жобалар таныстырылып отыр»,-деді форумда сөйлеген ҚХА Төрағасының орынбасары Ералы Тоғжанов.
Осы орайда ол 100-ге тарта жобаның 60-қа жуығы индустриялық-инновациялық жобалар екенін, оның ішінде өнеркәсіп, ауыл шаруашылығы, сонымен қатар құрылыс , металлургия салаларындағы жобалар бар екенін жеткізді.
«Аталған 60-қа жуық нақты жобалар бүгінгі осы форумға шығарылды. Осы жобалардың алтауын Индустрия және жаңа технологиялар министрлігі қарастырып, оларды іске қосуға және қаржыландыру мүмкіндігі жасалып отыр»,-деді Е. Тоғжанов.
Атап айтқанда, форум аясында 3 секциядан тұратын көрме ұйымдастырылды. Ондағы біріншісі этномәдени бірлестіктердің бизнес, ауыл шаруашылығы, индустриялық-инновациялық даму салаларындағы бастамалары тақырыбына, ал екінші секция ҚХА-ның әлеуметтік қолдау және қоғамды әлеуметтік жаңғыртуға қатысты жобалары, сондай-ақ соңғысы Қазақстанның барлық аймақтарынан келген қолөнер шеберлерінің жұмысына арналған.
Форум Елбасының ҚХА-ның XVII сессиясында Ассамблеяның Қазақстанды индустриялық-инновациялық дамыту және әлеуметтік жаңғырту үдерісіндегі рөлін нығайту бойынша берген тапсырмаларын орындау мақсатында ұйымдастырылып отыр