Қазақстан халқының саны келесі жылдың сәуірінде 17 миллионға жетеді

АСТАНА. 15 қараша. ҚазАқпарат - Қазақстандықтардың саны келесі жылдың сәуірінде 17 миллионға жетеді. Бұл туралы бүгін Астанада Статистика агенттігінің төрағасы Әлихан Смайылов мәлім етті.

Агенттік басшысы қазақстандықтардың ұлттық құрамына да жіті тоқталды. 1 қазандағы жағдай бойынша, елде 10 млн. 945 мың 58 қазақ бар. Бұл халықтың 65 пайызын құрайды. Орыстардың саны 3 708 мың (22 пайыз), өзбектер - 504 мың (3 пайыз), украиндар - 308 мың (1,8 пайыз), ұйғырлар - 240 мың (1,4 пайыз), татарлар - 203 мың (1,2 пайыз), немістер - 181 мың (1,1 пайыз). 

«Желтоқсан айында республикадағы қазақтардың саны 11 миллионға жетеді деген болжам бар. Жалпы халықтың саны келесі жылдың сәуір айында 17 миллион болады», - деп атап өтті Ә.Смайылов.

Оның айтуынша, халықтың орташа өмір сүру ұзақтығы 69,5 жас. «Келесі жылы өмір сүру жасы 70-ке жетеді», - деді ол.