Қазақстан Қарулы күштерінің құрамасы әлем чемпионатында жалпыкомандалық бірінші орынды жеңіп алды
АСТАНА. Қазанның 18-і. ҚазАқпарат - Қазанның 8-18-і аралығында АҚШ-тың Солтүстік Каролина штатындағы Джексонвиль қаласында бокстан әскерилер арасындағы 53-ші әлем чемпионаты өтті. Бұл жарысқа Қазақстан Қарулы күштерінің бокс құрамасы қатысты, деп хабарлады қорғаныс ведомствосының баспасөз қызметінен.
Байрақты бәсекеге әлемнің 14 елінен, атап айтқанда Италия, Нидерланды, Шри-Ланка, Украина, АҚШ, Бразилия, Дания, Франция, Үндістан, Эстония, Ирландия, Барбадос, Тринидад және Тобаго, Қазақстан сияқты елдерден барлығы 68 боксшы қатысты.
Қазақстан Қарулы күштерінің құрамасы 10 салмақ санатында өнер көрсетіп, 9 жүлделі орын жеңіп алды. Нәтижесінде жалпыкомандалық бірінші орынды иеленді. Қазақстанның Қарулы күштерінің боксшылары осы чемпионаттың қорытындысы бойынша 2011 жылы шілденің 16-24-і аралығында Рио-де-Жанейрода өтетін Армия спорты дүниежүзілік кеңесінің V жазғы әлем ойындарына жолдама алды.
Жарыста 1-ші және 2-ші орын алған кіші сержант Б.Абдрахманов, қатардағы жауынгерлер М.Ақшалов, И.Сүлейменов, А.Мұқанов, Е.Жанабергеновтар көзге түсті.
