Қазақстан құрамасы екі кездесуде де жеңіліп қалды

АСТАНА. ҚазАқпарат - Иранда өтіп жатқан әлем кубогінің екінші кезеңінде қазақ балуандары немістерге есе жіберді, деп хабарлайды ҚазАқпарат тілшісі.

Алғашқы кездесулерінде ресейліктерден оңбай ұтылған Қазақстан құрамасы екнші айналымда немістерден де ұтылып қалды. Ең жеңіл салмақта сайысқа түскен Жансерік Сәрсенбиев Кристофер Иосефтен 3:4 есебімен ұтылса, 66 келіде бозкілемге шыққан Данияр Қаленов Эрик Вэйссті оңай ұтып, есепті теңестірді. Ал 71 келіде Демеу Жадыраев Максимилиан Андрэсті жеңіп,  Қазақстан құрамасын алға шығарды.
Алайда 75 келіде белдескен Темірлан Шадукаев Флориан Нэумайерге есе жіберсе, Даулет Жақсылықов Паскаль Эйселден айласын асыра алмады. 85 келіде сынға түскен Азамат Құстыбаев Рамсин Азизсирден ұтылса, 98 келіде Әлімхан Сыздықов Оливэр Адрианға күші жетпеді. Сондай-ақ, аса ауыр салмақта Дамир Күзембаев Эдуард Поптан ұтылып қалды.
Енді Қазақстан құрамасы тек 5-6 орынға таласуына мүмкіндіктері бар.