Қазақстан мен China Transinfo Group пилотсыз көлікті дамыту жөнінде меморандумға қол қойды
АСТАНА. KAZINFORM - Астанада өткен NEW SILK WAY халықаралық көлік форумы аясында Қазақстан Республикасы Көлік министрлігі мен Қытайдың China Transinfo Group компаниясы пилотсыз көлік пен көлік саласын цифрландыру бағытында өзара түсіністік туралы меморандумға қол қойды.
ҚР Көлік министрлігі баспасөз қызметінің хабарлауынша, құжат пилотсыз көлік технологиялары мен цифрлық шешімдерді көлік саласына енгізу бойынша ұзақ мерзімді ынтымақтастыққа негіз қалайды.
Қазақстан халықаралық көлік дәліздерін дамытып, тасымал тиімділігін арттыру және елдің транзиттік әлеуетін толық пайдалану үшін заманауи технологияларды енгізіп келеді.
-Биыл Қазақстан мен Ресей «Астана – Мәскеу» бағыты бойынша пилотсыз жүк көліктерінің пилоттық жүрісін жүзеге асырды. Ендігі қадамдардың бірі – Қытаймен бірлесіп, халықаралық көлік дәліздерінің жекелеген учаскелерінде осындай жобаны іске қосу мүмкіндігін қарастыру,-делінген хабарламада.
Бұл Қазақстан мен Қытай арасындағы халықаралық автомобиль қатынасын дамытуға және көлік байланысын нығайтуға ықпал етпек.
Осыған дейін Қазақстанның авиациялық оқиғаларды тергеу саласында ИКАО тәжірибесін енгізетіні туралы жаздық.
