Қазақстан мен Испания СІМ арасындағы саяси консультациялардың 8-ші раунды Астанада өтеді
АСТАНА. KAZINFORM – 2026 жылғы 16 маусымда Астанада Қазақстан Республикасы мен Испания Корольдігінің Сыртқы істер министрліктері арасындағы саяси консультациялардың 8-ші раунды өтеді. Бұл туралы ҚР Сыртқы істер министрлігінің ресми өкілі Ерлан Жетібаев мәлімдеді.
Оның айтуынша, қазақстандық делегацияны ҚР Сыртқы істер министрінің орынбасары Арман Исетов, ал Испания делегациясын Испанияның мемлекеттік хатшысы Диего Мартинес Белио басқарады.
– Консультация барысында тараптар саяси диалогты дамыту, сауда-экономикалық және инвестициялық байланыстарды нығайту, мәдени-гуманитарлық ынтымақтастықты кеңейту, сондай-ақ халықаралық және өңірлік күн тәртібіндегі өзекті мәселелерді қоса алғанда қазақ-испан ынтымақтастығының кең ауқымды бағыттарын талқылауды жоспарлап отыр, – деді ведомство өкілі брифингте.
Сондай-ақ Ерлан Жетібаевтың айтуынша, сол күні Қазақстан мен Испанияның мемлекеттік органдары, іскер топтары, сарапшылық қоғамдастығы және академиялық институттары арасындағы байланысты нығайтуға арналған жаңа диалог алаңы – Қазақстан–Испания форумының алғашқы отырысы өтеді.
– Форум перспективалы бірлескен жобаларды ілгерілетуге және өзара іс-қимылдың басым бағыттарындағы практикалық ынтымақтастықты кеңейтуге ықпал етеді деп күтеміз. Алдағы іс-шаралар Қазақстан мен Испания арасындағы стратегиялық әріптестікті одан әрі дамытудың маңызды кезеңі ретінде қарастырылып, екіжақты көпқырлы ынтымақтастықты кеңейтуге қосымша серпін беруге бағытталған, – деді ол.
Министрлік өкілінің айтуынша, кездесу барысында қол жеткізілген уағдаластықтарды іске асыруға және алдағы екіжақты іс-шараларға дайындық мәселелеріне де ерекше назар аударылады.
Бұған дейін Қазақстан техникалық байқауды цифрландыру үшін Испания тәжірибесін енгізетінін жазғанбыз.
