Қазақстан мен Қырғызстан авиациялық құтқару жұмыстарында ынтымақтастықты нығайтады
АСТАНА. KAZINFORM – Бүгін Мәжілістің жалпы отырысында «Қазақстан Республикасының Үкіметі мен Қырғыз Республикасының Министрлер Кабинеті арасындағы авиациялық іздестіру және құтқару саласындағы ынтымақтастық туралы келісімді ратификациялау туралы» Заңы қабылдады.
Заң жобасы 2022 жылғы 26 мамырда Бишкек қаласында жасалған екі ел үкіметтері арасындағы авиациялық іздестіру және құтқару саласындағы ынтымақтастық туралы келісімді ратификациялауға бағытталған.
Келісімнің мақсаты — Халықаралық азаматтық авиация ұйымының (ИКАО) стандарттарына сәйкес, апаттық жағдайдағы немесе апатқа ұшыраған әуе кемелерінің жолаушылары мен экипаждарын іздестіру және құтқару үшін мемлекеттердің іздестіру-құтқару қызметтері арасындағы ынтымақтастықты нығайту.
Осы Келісім мемлекеттердің әуе кемелерін іздестіру және құтқару саласындағы іс-қимылдарын үйлестіруге ықпал етеді.
Сондай-ақ келісімнің мақсаттарына мыналар кіреді:
— авиациялық оқиғалар туралы өзара хабарлау және апаттық жағдайдағы немесе апатқа ұшыраған әуе кемелерінің жолаушылары мен экипаждарын іздестіру және құтқару бойынша барлық қажет шараны дереу қабылдау;
— екі жақтың іздестіру-құтқару қызметтерінің бірлескен оқу-жаттығуларын өткізу, ақпарат пен тәжірибе алмасу;
— іздестіру-құтқару жұмыстарын жүргізу кезінде, оның ішінде трансшекаралық аумақта тараптардың бірінің өтініші бойынша өзара көмек көрсету (авиациялық және жерүсті іздестіру-құтқару күштерімен қамтамасыз ету).
