Қазақстан мен Ресей арасында сауда-саттық артып келеді - Мемлекет басшысы
АСТАНА. ҚазАқпарат – Қазақстан мен Ресей арасында сауда-саттық артып келеді. Бұл туралы екі елдің өңіраралық ынтымақтастық форумының XVIII жалпы отырысына қатысушыларға видеоконференция режимінде сөз арнаған Мемлекет басшысы Қасым-Жомарт Тоқаев айтты, деп хабарлайды ҚазАқпарат тілшісі.
«Өткен жылы Қазақстан мен Ресей арасында тауар көлемі жаңа рекордты мәнге жетіп, іс жүзінде 24,5 млрд АҚШ долларын құрады. Осы жылдың алғашқы он айының қорытындысында да тауар айналымы 5 пайызға өскенін көрсетіп отыр», - деді Қасым-Жомарт Тоқаев.
Қазақстан Президенті Ресейге қазақстандық экспорт түрлерінің де артқанын баса айтты.
«Өткен жылмен салыстырғанда тауарлық позиция саны 640-тан 1 050 атауға дейін артты. Ресейлік өңірлерге жеткізілім 2,5 есеге жуық ұлғайды. Бұл – Алматыдан. Ал мысал ретінде айтар болсақ, Астанадан 5 есеге өсті. Шекара маңындағы сауда да айтарлықтай жандана түсті. Айталық, Ақтөбе облысынан Ресейге жеткізілім - 48, Павлодар облысынан 36 пайызға артты», - деді Қасым-Жомарт Тоқаев.
