Қазақстан мен Румыния арасында мұнай-газ саласы бойынша тауар айналымы артты
НҰР-СҰЛТАН. ҚазАқпарат - Қазақстанның Елшісі Нұрбах Рүстемов Румынияның Энергетика министрі Вирджил Попескумен келіссөздер өткізді, деп хабарлайды ҚазАқпарат ҚР Сыртқы істер министрлігінің баспасөз қызметіне сілтеме жасап.
Тараптар 2021 жылғы ынтымақтастықтың қорытындыларын талқылады, ағымдағы жағдайды қарастырды және орта мерзімді перспективаға арналған жоспарларды белгіледі.
Әңгімелесу барысында Елші Қазақстанның Румыниямен энергетика саласындағы қарым-қатынасты нығайтуға дайындығы туралы ұстанымын жеткізді. Сондай-ақ «ҚазМұнайГаз Интернейшнл» компаниясының дамуы және оның қазақстандық энергетикалық ресурстарды Еуропаға экспорттаудағы белсенді қызметі туралы да сөз болды.
Сонымен қатар, қазақстандық дипломат еліміздегі ағымдағы ахуал, сондай-ақ Үкіметтің шетелдік инвестициялық субъектілерді, оның ішінде Қазақстанның энергетикалық секторында өкілдік ететін румындық компанияларды қорғау бойынша қабылдап жатқан шаралары туралы егжей-тегжейлі хабардар етті.
Өз кезегінде Министр В.Попеску екі ел арасындағы қарым-қатынастың одан әрі нығая түсетініне сенім білдіріп, мұнай-газ саласындағы тауар айналымының артуын атап өтті.
