Қазақстан мен Сауд Арабиясы арасындағы сауда айналымы 2,9 есе өсті
АСТАНА. KAZINFORM — Қазақстан мен Сауд Арабиясы тау-кен өндірісі және маңызды минералдарды игеру саласындағы бірлескен жобаларды дамытуға уағдаласты. Премьер-министр Олжас Бектенов «Astana Mining & Metallurgy 2026» конгресі аясында Сауд Арабиясының өнеркәсіп және минералдық ресурстар министрі Бандар әл-Хураифпен маңызды кездесу өткізді. Бұл туралы Үкіметтің баспасөз қызметі хабарлады.
Сауд Арабиясы Қазақстанның Таяу Шығыстағы негізгі сауда-экономикалық серіктестері қатарына кіреді. Қазақстан мен Сауд Арабиясы көшбасшыларының өзара қолдауы нәтижесінде сенімді әрі достық қарым-қатынастар орнағаны атап өтілді.
2025 жылдың қорытындысы бойынша екі ел арасындағы өзара сауда көлемі 17%-ға артып, $11,7 млн-ды құрады. Биылғы қаңтар-сәуір айларында тауар айналымы 2,9 есеге өсіп, $6,1 млн-нан асты. Кейінгі 20 жылда Сауд Арабиясы Корольдігінен Қазақстан Республикасына тартылған тікелей шетелдік инвестиция көлемі $115,3 млн-ды құрады. Биылғы ақпан айында қол қойылған Қазақстан – Сауд Арабиясы үйлестіру кеңесін құру туралы келісім және инвестицияларды өзара ынталандыру мен қорғау туралы келісім жаңа бірлескен бастамаларды жүзеге асыру үшін қосымша мүмкіндіктер ашады.
Тау-кен металлургия кешеніндегі ынтымақтастықты одан әрі дамыту мәселелеріне, сондай-ақ аса маңызды минералдар саласындағы бірлескен жобаларды жүзеге асыру перспективаларына назар аударылды. Пайдалы қазбаларды барлау, өндіру және өңдеу, сондай-ақ қосылған құны жоғары өндірістерді дамыту саласындағы өзара іс-қимыл талқыланды.
Кездесуге қатысушылар тау-кен металлургия және аса маңызды минералдар саласында екіжақты өзара іс-қимылды арттыруға дайын екендерін растады.
Бұдан бұрын Қазақстан мен Қытай инновациялық қалаларды дамыту бағытында ынтымақтастықты күшейтетінін жазғанбыз.
