Қазақстан мұнай және газхимиялық өнімдер экспортын 2,5 млрд. долларға жеткізуді жоспарлауда - Ә.Исекешев
АСТАНА. ҚазАқпарат - Қазақстан 2019 жылға қарай мұнай және газхимиялық өнімдердің экспортын 2,5 млрд. АҚШ долларына жеткізуді жоспарлауда. Бұл туралы бүгін VII Астана экономикалық форумында ҚР Премьер-Министрінің орынбасары - Индустрия және жаңа технологиялар министрі Әсет Исекешев мәлім етті.
«Мұнай және газхимия бізде жаңа сала болады. 2019 жылы бізде отандық полипропилен, полиэтилен, полимерлі өнімдер және оның экспорты 2,5 млрд. АҚШ долларына жетеді. Осылайша нөлден бастаған сала өңдеуші саланың 5 пайыз үлесін құрайтын болады», - деп атап өтті ол.
Ол сонымен қатар 2016-2017 жылға қарай елдегі мұнай өңдеуші зауыттардың барлығы жаңғыртылудан өтіп бітетіндігін хабарлады. Ол өз кезегінде жылына 19 млн. тонна мұнайды өңдеуге мүмкіндік береді және ішкі нарықты жоғары сапалы еуро-4 пен еуро-5 жанар-жағармайларымен қамтамасыз етуге сеп болады.
