Қазақстан рухани-өнегелі құндылықтары оның толыққанды дамуына жағдай жасайтын мемлекеттің үлгісі бола алады - Ресейдің діни қайраткерлері
АСТАНА. Шілденің 10-ы. ҚазАқпарат - ҚР Президентін мерейтойымен құттықтаған хаттар Ресейдің діни қайраткерлерінен де келіп түсті, деп хабарлайды ҚР Президентінің баспасөз қызметі.
Мәскеу және күллі Ресей Патриархы Кирилл өз хатында Нұрсұлтан Назарбаевты мерейтойымен құттықтап, еліміз қол жеткізген зор табыстарды атап өткен. «Бүгінде Қазақстан рухани-адамгершілік құндылықтары елдің толыққанды ілгерілеушілігіне сай келетін мемлекет үлгісі бола алатынына мен куәлік етемін» делінген патриархтың құттықтауында.
Ресей мүфтийлері кеңесінің төрағасы Р.Гайнутдиннің хатында: «Сіздің Қазақстан Республикасы басшылығындағы жиырма жылдан астам қызметіңіз, Сіздің бастамаларыңыз, Сіздің жаныңыздың елгезектігі, сөздеріңіз бен мемлекет істеріндегі өмірлік тәжірибеге құрылған пайымды парасатыңыз Сізге деген шынайы сыйластық пен бүкілхалықтық құрметті оятты», - делінген.
