Қазақстан симфониялық оркестрі Латын Америкасындағы гастрольдік сапарын Бразилиядан бастады
АСТАНА. ҚазАқпарат - ҚР Бразилиядағы Елшілігінің, Мәдениет министрлігі, сондай-ақ бразилилиялық «Dell'Arte» продюсерлік компаниясының қолдауымен Рио-де-Жанейро қаласында ҚР Мемлекеттік академиялық симфониялық оркестрінің Бразилиядағы гастрольдері өтіп жатыр.
Бұл туралы ҚР СІМ баспасөз қызметінен хабарлады.
Оркестр бағдарламасында концерттердің өтуі Бразилия мен қоса Аргентинада да жоспарланған. Бұл іс-шаралардың басты мақсаты - Қазақстанның Бразилия және Аргентинамен мәдени байланыстарын одан әрі нығайту мен кеңейту, сондай-ақ бразилиялықтар мен аргентиналықтарға Қазақстанның мәдениеті мен өнерін насихаттап, кеңінен таныстыру.
Оркестр солисі - «Болашақ» Президенттік бағдарламасының иегері, Лондон қаласының Корольдік музыка Академиясының түлегі, халықаралық конкурстардың лауреаты, талантты қазақстандық скрипкашы Ғалия Бисенғалиева болса, дирижерлікті белгілі француздық дирижер Николя Крауз атқарады.
Рио-де-Жанейро қаласынан басқа концерттер Аргентинаның Буэнос-Айрес, Розария және Кордоба сияқты ірі қалаларында өз жалғасын табады. Атап айтқанда, Буэнос-Айресте концерт тек Латын Америкасында ғана емес, сондай-ақ бүкіл әлемге әйгілі «Колон» театрында өтеді.
