Қазақстан Сыртқы істер министрі Минск қаласына сапарлайды
АСТАНА. KAZINFORM – Қазақстан Сыртқы істер министрі Мұрат Нұртілеу Тәуелсіз Мемлекеттер Достастығы министрлері кеңесінің отырысына қатысады. Бұл туралы Сыртқы істер министрлігінің ресми өкілі Айбек Смадияров айтты.
«2024 жылғы 12 сәуірде Минск қаласында Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Тәуелсіз Мемлекеттер Достастығы Сыртқы істер министрлері кеңесінің кезекті отырысына қатысады. Іс-шара барысында өңірлік және халықаралық күн тәртібінің өзекті аспектілерін, ТМД аясындағы өзара іс-қимылдың жай-күйі мен перспективаларын талқылайды», - деді А. Смадияров ведомстводағы апталық баспасөз мәслихатында.
Сыртқы істер министрлері кеңесінің отырысында саяси және мәдени-гуманитарлық салалардағы, туризм және спорт саласындағы өзара іс-қимылды нығайтуға бағытталған бірқатар шешімдер қабылдау, сондай-ақ ТМД мемлекеттері басшыларының қарауына енгізу үшін құжаттардың жобаларын мақұлдау ескерілген.
«Сонымен қатар, сыртқы саяси ведомстволарының басшылары бірқатар бірлескен мәлімдемелер қабылдауды жоспарлап отыр», - деді ресми өкіл.
