Қазақстан сыртқы сауда жүргізу рәсімдерін жеңілдетті - Е.Досаев

АСТАНА. ҚазАқпарат - Қазақстан сыртқы сауда жүргізу рәсімдерін жеңілдетті. Бұл туралы бүгін ҚР Президенті жанындағы Орталық коммуникациялар қызметіндегі брифингте ҚР Ұлттық экономика министрі Ерболат Досаев мәлім етті.

«Сыртқы сауданы жүргізу рәсімдерін жеңілдету мақсатында экспорттық-импорттық операцияларды жасау кезіндегі құжаттар саны қысқартылды. Тауарларды экспорттау кезінде - 3 құжат, импорттау кезінде - 4 құжат қысқарды. Бұл ретте сыртқы экономикалық қызметке қатысушылардың тәуекел деңгейі төмен, орта және жоғары 3 санатын енгізе отырып, тәуекелдерді басқару жүйесін қолданудың тәсілдері қайта қаралды», - деді Е.Досаев.

Сонымен қатар министрдің атап өтуінше, Қаржы министрлігі Ұлттық кәсіпкерлер палатасымен бірлесіп, посткедендік ресімдеу бойынша «300 ірі салық төлеушіге арналған жасыл дәліз» ілкі жобасын іске асырған.