Қазақстан темір жолы наурыздың 19-ынан бастап жаңа жолаушылар және қалааралық пойыздарды жолға шығарады
АСТАНА. Наурыздың 12-сі. ҚазАқпарат /Марлан Жиембай/ - «Қазақстан темір жолы» ұлттық компаниясы» АҚ наурыздың 19-ынан бастап жаңа жолаушылар және қалааралық пойыздардың жолға шығатындығы туралы ақпарат таратып отыр.
Аталған компанияның баспасөз қызметінің таратқан ақпаратына сәйкес, Астана мен Алматы қалаларының арасында үш күнде бір рет 15 вагоннан тұратын №36/35 жолаушылар пойызының бір құрамы қатынайтын болады. Пойыз Астанадан Алматыға 17 сағат 20 минутта, ал Алматыдан Астанаға 18 сағат 01 минутта жүреді. Екі аралықты жүру уақыты - 19 сағат 01 минут және сәйкесінше 20 сағат 44 минут.
Сондай-ақ аптасына екі мәрте (жұма, жексенбі күндері) Астана мен Павлодар қалаларының арасына 8 вагоннан тұратын №801/802 пойызы қатынайды. Жолаушылар көлігі Астанадан Павлодарға 17 сағат 30 минутта, ал Павлодардан Астанаға 8 сағат 45 минутта аттанады. Сондай-ақ олардың да екі аралықты жүріп өту уақыттары сәйкесінше 6 сағат 29 минут және 6 сағат 15 минутқа тең.
Ал Ақтөбе мен Алматы-2 арасына қатынайтын №34/33 жолаушылар пойызына қосымша 4-ші құрама енгізіліп, ол күн сайын (бұған дейін аптасына 4 рет) қатынайды.
Аталған жолаушылар пойызына билетті наурыздың 12-сінен бастап теміржол кассаларынан алуға болады.
