Қазақстан ТМД аясындағы ынтымақтастықты кеңейтуге мүдделі - Смайылов
АСТАНА. ҚазАқпарат – Қазақстан ТМД аясындағы ынтымақтастықты кеңейтуге мүдделі. Бұл туралы ТМД Үкімет басшылары кеңесінің кеңейтілген құрамдағы отырысында ҚР Премьер-Министрі Әлихан Смайылов айтты, деп хабарлайды ҚазАқпарат тілшісі.
«Өткен жылы ТМД 30 жылдық мерейтойын атап өтіп, бүгінде Достастық дамудың жаңа кезеңіне аяқ басты. Осы жылдар ішінде ұйым өзінің қажеттілігін дәлелдеп, елдеріміз арасындағы достық қарым-қатынастың берік іргетасына айналды. Көпқырлы ынтымақтастық өзара сенім, прагматизм және мүдделер теңгерімін сақтау қағидаттарын ескере отырып құрылған», - деді Әлихан Смайылов.
ҚР Үкімет басшысы мұндай өзара іс-қимыл әлемдік экономикада болып жатқан жағымсыз үрдістерді төмендетуге мүмкіндік беретіндігін, өзара тиімді әріптестікті дамытуға ықпал ететіндігін баса айтты..
«Ұйым аясында қабылданған іс-шаралардың арқасында білім беру, медициналық-әлеуметтік, азаматтық-құқықтық сипаттағы көптеген мәселе сәтті шешілді. Азаматтарымыздың Достастық мемлекеттері арасында визасыз жүріп-тұру мүмкіндігі бар. Қазақстан ТМД-ның белсенді қатысушыларының бірі ретінде ынтымақтастықты кеңейтуге, әлеуетті нығайтуға және оның мүмкіндіктерін ашуға мүдделі», - деді ҚР Премьер-Министрі.
Фото: t.me/KZgovernment
