Қазақстан төлқұжаты - саяхаттардың әлемдік рейтингінде
АСТАНА. ҚазАқпарат - Global Passport Power Rank 2018 саяхаттауға тиімді төлқұжаттардың жаңа рейтингін жариялады, деп хабарлайды «ҚазАқпарат» ХАА.
Ең өтімді төлқұжат иесі 2017 жылдағы секілді Германия азаматтары болып қалды. Германия азаматтары үшін визасыз елдердің саны 158-ден 161-ге дейін артты.
2-орындағы Сингапурдың төлқұжаты бар адам 160 елге виза рәсімдемей бара алады. Рейтингінің екінші орнын, сонымен қатар Дания, Швеция, Финляндия, Италия, Франция, Испания, Оңтүстік Корея елдері де бөлісіп тұр.
Украина 30-орында тұр. Киев 122 елмен визасыз режим енгізген.
Азаматтарына 109 елге визасыз баруға мүмкіндігі бар Ресей 42-орыннан 40-орынға көтерілді.
108 елмен визасыз режим орнатқан Түркия 41-орынға табан тіреді.
Молдова мен Грузия 42-орында, бұл елдердің азаматтары 106 елге визасыз баруына болады.
Қазақстан 59-орында келеді. Біздің қолымыздағы төлқұжат 71 елге еркін саяхаттауға мүмкіндік береді. Қазақстанмен бірге Беларусь та 71-орында тұр.
64 елге визасыз баратын Әзербайжан мен Қытай 65-орында.
Қырғызстан (визасыз режим енгізілген 59 ел) 69-орында Армениямен бірге тұр.
58 елмен визасыз режим енгізген Моңғолия 70-орында болса, Өзбекстан, Тәжікстан, Үндістан елдері 72-орында (55 ел).
Түрікменстан 77-ші (50), ал тізімнің соңғы 94-қатарын азаматтары 25 елге еркін баратын Ауғанстан қорытындылады.
