Қазақстан Үкіметі бизнесті инновациялық қызметке тартуға мүдделілік танытады

Бұл туралы бүгін елордада өтіп жатқан «Эксперт-100-Қазақстан» атты ірі бизнестің  4-інші экономикалық форумында ҚР Премьер-Министрі Серік Ахметов айтты.

«Біз бизнесті инновациялық қызметке тартуға қызығушылық танытудамыз. Үдемелі индустриалды-инновациялық даму мемлекеттік бағдарламасы аясында  ірі жобаларды жүзеге асыру басталды. Бағдарлама экономиканы жаңғыртуға әрі әртараптандыруға, сонымен қатар отандық бизнес үшін жаңа перспективалардың пайда болуына серпін береді», - деді С.Ахметов.

Осы ретте оның пайымынша,  мемлекет пен бизнестің әріптестігі  әлемдік экономикалық дағдарыстың болжанып отырған "жаңа толқыны" жағдайында барынша маңызды бола түспек. Ал, ол үшін мемлекеттік органдар мен бизнес-құрылымдардың сындарлы өзара түсінушілігі мен іс-әрекет үйлесімділігі қажет екендігін баса айтқан Үкімет басшысы: «Біз бизнеспен бірлесіп жұмыс істеуге және ынтымақтастыққа әрқашанда да дайынбыз», - деді.