Қазақстан жеті айда 48,9 млрд доллардың өнімін экспорттады
НҰР-СҰЛТАН. ҚазАқпарат – 2022 жылдың жеті айында Қазақстанның сыртқы тауар айналымы 74,3 млрд долларға жетті. Бұл туралы ҚР Ұлттық экономика министрі Әлібек Қуантыров Үкімет отырысында жәлім етті, деп хабарлайды ҚазАқпарат тілшісі.
«Биылғы қаңтар-шілдеде сыртқы сауда тауар айналымы 36,9% өсіп, 74,3 млрд долларды құрады. Оның ішінде экспорт бойынша көрсеткіш 52,9% артып, 48,9 млрд долларға дейін жетті. Бұл ретте өңделген тауарлар экспорты 35,7% ұлғайып, 14,3 млрд долларды құрады. Тауарлар импорты 25,3 млрд долларды құрады. Жалпы, оң сауда балансы 23,6 млрд долларға тең», - деді Әлібек Қуантыров,
Айтуынша, өңдеу өнеркәсібінде оң өсу қарқыны сақталып отыр. Қаңтар-тамыз аралығында өндіріс көлемі 4,8% өскен.
«Соның ішінде 16 өңір бойынша оң өсу көрсеткіші тіркелді. Ең жоғарғы өсу Шығыс Қазақстан, Жамбыл және Қостанай облыстарында, сондай-ақ Алматы қаласында байқалып отыр.
Өңдеу өнеркәсібі салалары бойынша машина жасау өндірісінің 7,9%, оның ішінде автомобиль жасаудың – 18,2%, электр жабдықтарын жасаудың – 8,3%, азық-түлік тауарлары – 3,5%, сусындар – 7,5%, пластмасса бұйымдары – 5,1%, дайын металл бұйымдары – 2,4%, химия өнеркәсібі тауарларының – 11,8%, киім өндірісінің – 7,1% өсуі қамтамасыз етілді», - деді министр.
