Қазақстанда 10 мыңдай адам КСРО-ның төлқұжатымен жүр
АСТАНА. 25 маусым. ҚазАқпарат - ҚР Президенті жанындағы Адам құқықтары комиссиясы шығарған «Қазақстан Республикасындағы оралмандар, азаматтығы жоқ адамдар мен босқындар құқықтарының ахуалы туралы» арнайы баяндама Қазақстанда бұрынғы КСРО төлқұжатымен жүрген азаматтардың бар екендігін көрсетті.
Ресми мәліметке сәйкес, 2011 жылы Қазақстанда 7872 азаматтығы жоқ адам тіркелген. Олардың ішінде ТМД елдерінен келген 7467 және шетелден шыққан 405 адам бар. «9700 адамның азаматтығы әлі анық емес. Олар әлі күнге дейін бұрынғы КСРО-ның төлқұжатымен жүр», - делінген баяндамада.
Ал босқындар санына келер болсақ, 2011 жылы олар 559 адам немесе 207 отбасыны құраған. Олардың ішінде 313 тәжік, 115 пуштун, 80 хазар, 35 өзбек және 16 өзге ұлт өкілі бар.
