Қазақстанда 10 жыл сайын тұрғын үй коммуналдық шаруашылығының нормативтік базасы жаңартылмақ
АСТАНА. 26 қазан. ҚазАқпарат - Қазақстанда әр 10 жыл сайын тұрғын үй коммуналдық шаруашылығының (ТКШ) нормативтік базасын жаңартып отыру жоспарлануда.
Бұл жайында бүгін Астанада аталған саланы ғылыми тұрғыда қамтамасыз етуге негізделген ғылыми-тәжірибелік конференцияда ТКШ-ны дамытудың қазақстандық ғылыми-техникалық орталығының бас директоры Дамир Егізбаев айтты.
Оның сөзіне қарағанда, ТКШ саласы 200-ден астам нормативтік-техникалық құжаттармен реттеледі. «Биыл біз 20 нормативтерді қайта өңдейміз, сондай-ақ елімізде әр 10 жыл сайын ТКШ-ның барлық нормативтік базасы жаңартылып отыруы үшін жыл сайын 20-30 нормативтерді қайта өңдеуді жоспарлап отырмыз»,-деп атап өтті Д. Егізбаев.
Бас директор биылдан бастап Қазақстанда алғаш рет тұрғын үй коммуналдық шаруашылығы саласында қолданбалы ғылыми зерттеулердің кешенді бағдарламасын жүзеге асыру басталғанын ескеріп өтті. Ол 4 бағыт және 6 тақырып бойынша іске асырылмақ. Атап айтқанда, оның ішінде сумен қамтамасыз ету мен су бұру, энергия үнемдеу, жылумен қамтамасыз ету және коммуналдық қалдықтар тұрғысындағы жұмыстар қамтылған.
