Қазақстанда 6 мың түрлі дәрі-дәрмек шекті бағамен сатылады

АЛМАТЫ. KAZINFORM — Елде бөлшек және көтерме саудада өткізу үшін дәрілік заттардың 6 мыңнан аса саудалық атауына шекті бағалар бекітілген.

Денсаулық сақтау министрінің 2023 жылғы бұйрығына сәйкес, дәрі-дәрмектің құны белгіленген шекті бағадан төмен болады.

Бұл қадам елдің барлық аумағындағы баға саясатын реттеуге көмектеседі. Яғни, белгілі атаулы дәрінің бағасы барлық жерде бірдей. 

— Бөлшек және көтерме саудада өткізу үшін дәрілік заттардың 6 мыңнан аса саудалық атауына шекті бағалар бекітілген. Дәріхана ұйымдарында дәрі-дәрмектер бекітілген шекті бағадан төмен бағада сатылуы мүмкін екенін айта кеткен жөн, — делінген Денсаулық сақтау министрлігінің Kazinform сауалына жолдаған жауабында.

Әкімшілік құқық бұзу туралы кодекстің 426-бабына сәйкес дәрі-дәрмекті бекітілген шекті бағадан асыра сатқандарға жауапкершілік көзделген. 

Сонымен қатар, шекті бағадан асыра сату фактісі анықталған жағдайда, Медициналық және фармацевтикалық бақылау комитетінің аумақтық департаменттеріне дәлелді құжаттармен, яғни дәрі-дәрмек және сату түбіртегімен немесе DARIKZ мобильді қосымшасы арқылы өтініш қалдыруға болады.

Еске салайық, осыған дейін Ұлттық экономика министрі импорт дәрілердің бағасы туралы айтқан болатын.