Қазақстанда Ан-28 ұшағының жетеуі ғана қалды
АСТАНА. ҚазАқпарат - ҚР ИДМ Азаматтық авиация комитеті төрағасы орынбасарының міндетін атқарушы Тоты Әмірова Қазақстанда Ан-28 ұшағының жетеуі ғана қалғанын мәлім етті, деп хабарлайды «ҚазАқпарат» ХАА тілшісі.
«Олардың үшеуі жарамдылық мерзімді өтіп кеткені үшін қазіргі таңда ұшпайды. Біреуі жұмыс істемесе, тағы бірі әуе апатының салдарынан қатардан шығып қалды. Ан-28 ұшағының екеуі ғана қалғандықтан, оларды азаматтық авиация комитеті тексеретін болады. Бұдан кейін инженерлер ол әуе кемелері қолданылатыны немесе қолданылмайтыны туралы шешім шығарады», - дейді Тоты Әмірова жеңіл авиациядағы әуе апаттарына қатысты өткізілген баспасөз мәслихатында.
Сонымен қатар, баспасөз мәслихатында ҚР Инвестициялар және даму вице-министрі Роман Скляр 3 қазан күні Алматы-Шымкент бағытында шығып, құлаған Ан-28 санавиация ұшағының апатына қатысты пікірін білдірді.
«Қазіргі таңда тергеу амалдарының нәтижесін күткен абзал. Соған байланысты шешім қабылданатын болады. Әлбетте, ол да мүмкін (алдағы уақытта ұшуына тыйым салу туралы - авт.) Бізге жуық арада аталған ұшақтарды өндіретін зауыттан өкілдер келеді. Олармен қажетті кеңес жұмыстары жүргізіледі», - дейді вице-министр.
Еске сала кетсек, ҚР Инвестициялар және даму вице-министрі Роман Скляр жыл басынан бері жеңіл авиация бойынша 5 әуе апаты тіркеліп, оның салдарынан 11 адам қаза тапқанын хабарлаған болатын. Атап айтқанда, 3 қазан күні Алматыдан Шымкентке ұшқан Ан-28 санавиация ұшағы әуе апатына ұшырап, 5 адам қаза тапқан болатын. 10 тамыз күні Алматы облысында Tecnam 2002 оқу-жаттығу ұшағы құлап, 2 адам көз жұмған. Осыған ұқсас жағдайда 25 шілдеде ұшқыш жазым болған. Ал бұдан бір ай бұрын Як-12 ұшағы апатқа ұшырап, 2 адам мерт болған еді.
