Қазақстанда әскери билет қашан цифрландырылады

АСТАНА. ҚазАқпарат – «Ұлттық ақпараттық технологиялар» АҚ Басқарма төрағасы Ростислав Коняшкин әскери билеттер EGOV mobile платформасына қашан шығарылатынын айтты, деп хабарлайды ҚазАқпарат тілшісі.

«Әлеуметтік желілерде және БАҚ-та әскери билетті цифрландыру туралы хабар жарияланды. Қорғаныс министрлігінен осындай ұсыныс болды ма? Бұл жұмыстар басталды ма?», - деп сұрады тілшілер Орталық коммуникациялар қызметінде өткен баспасөз мәслихатында.

Ростислав Коняшкин Қорғаныс министрлігімен, оның ішінде әскери билет, тіркеу куәлігі бойынша, осы құжаттарды цифрлық форматқа шығару жұмыстары жүріп жатқанын айтты.

«Бұл құжаттарды цифрландыру жұмыстарын жоспарлап отырмыз, тіпті бастап кеттік деуге болады. Менің ойымша, бұл жұмыс келесі жылдың бірінші жартыжылдығында аяқталады. Биыл басымдықтар бойынша ел басшылығы қойған басқа да міндеттерді іске асырамыз», - деді Ростислав Коняшкин.