Қазақстанда азот тотығын анықтайтын жаңа сараптама әдістемесі әзірленді
АСТАНА. KAZINFORM – Қазақстанда денсаулыққа қауіпті азот тотығының заңсыз айналымына қарсы бақылау күшейтіледі. Бұл туралы Орталық коммуникациялар қызметінде өткен баспасөз конференциясында Әділет министрлігі Сот сараптамалары орталығының директоры Бақытжан Байтилесов мәлім етті.
Оның айтуынша, 2026 жылғы 1 қаңтардан бастап азот тотығын заңсыз сақтау, тасымалдау және өткізу әрекеттері үшін қылмыстық жауапкершілік қарастырылады.
– Азот тотығы уақытша эйфория бергенімен, адам денсаулығына өте қауіпті. Ол гипоксияға, жүйке жүйесінің бұзылуына және тіпті өлімге алып келуі мүмкін, - деді спикер.
Бақытжан Байтилесовтың сөзінше, қазіргі уақытта азот тотығын анықтаудың негізгі тәсілдері әзірленген. Негізгі мақсат – заттың құрамын нақты анықтап, зерттеу нәтижесінің дәлдігін қамтамасыз ету.
– Қазіргі таңда әдістеме жобасы аяқталып, аумақтық бөлімшелерді қажетті жабдықтар жиынтығымен жарақтандыру мәселесі шешіліп жатыр. Сонымен қатар сарапшыларды даярлау және қолданыстағы тізбеге мамандықтың жаңа түрлерін енгізу мәселесі пысықталуда, - деді ол.
Айта кетейік, Шымкент қаласында «ойын-сауыққа арналған газ» сатумен айналысқан 10 мекеме иесі жауапқа тартылып, 400-ден астам баллон азот тотығы тәркіленді.
