Қазақстанда бензин мен дизель өндірісі теңесті

АСТАНА. KAZINFORM — 2023 жылы елімізде бензин импорты азайып, дизель импорты 2,5 есе өскен. 

«2023 жылдың қаңтары мен қарашасы аралығында елде 4,8 млн тонна бензин өндірілген. Оның ішінде авиация бензині де бар. Импорт 5 есеге жуық азайған — 9,2 мың литр ғана. Өндірілген бензиннің бәрі ішкі нарыққа сатылған. Бұл 2022 жылдың көрсеткішінен 7,2% артық. Бұл жерде мемлекет жанармай экспортына қайта-қайта шектеу қойып келе жатқанын еске саламыз», — деп жазады Energyprom.kz.

2023 жылдың 11 айында елде 4,9 млн литр дизель өндіріліпті.

«Бұл — ішкі нарықта сатып алынған дизельдің 92,9% деген сөз. Қалған 7,1% — импортқа тиесілі. Яғни, 378,8 млн литр дизель сырттан әкелінген. Бұл 2022 жылдың көрсеткішінен 2,5 есе көп», — деп жазылған сараптамада.