Қазақстанда бір тәулікте 583 адам қар құрсауынан құтқарылды
АСТАНА. ҚазАқпарат - Қазақстанда өткен тәулікте қар құрсауынан 583 адам шығарылып, құтқарылды. Оның ішінде 34 бала болды, деп хабарлады ҚР ТЖМ баспасөз қызметінен.
Алматы облысында "Кеген-Жалаулы" жолының бойындағы жолда 15 жолаушысымен 5 жеңіл көлік қалып қойды. Құтқарушылар машиналарды жолдың тазартылған бөлігіне шығарды.
Павлодар облысында Ақсу ауданының Евгеньев және Үш терек ауылдарының арасындағы жолдың 8-шақырымында қар құрсауында төрт жолаушысы бар машина қалып қойған. Автокөлік ТЖД қызметкерлерімен жолдың тазартылған бөлігіне шығарылды.
Ақсу ауданының Парамоновка ауылының жанындағы 65-шақырымда 4 жолаушысы бар Қырғызстанның «Мерседес» шағын автобусы бензиннің қатып қалуынан жолда қалған. Құтқарушылар адамдарды Парамоновка ауылының мектебіне жеткізді.
Жамбыл облысында 13.30-да «Алматы-Ташкент» жолының бойында қар құрсауында 53 машина қалды, оның ішінде 8 жолаушылар автобус, 45 жеңіл көлік бар. Автокөліктердің салондарында 520 адам болған, олардың 32-сі балалар. Барлық автокөліктер жолдың тазартылған бөлігіне шығарылды.
Қарағанды облысының Шет ауданында «Ақсу-Аюлы-Ақадыр» жолының бойында қар құрсауында қалған 8 адам құтқарылды, оның ішінде бір бала бар.
«Қызылорда-Павлодар» жолының бойында қар құрсауынан 7 адам шығарылды, оның ішінде бір бала бар. Қызылорда облысында «Қызылорда-Жезқазған» жолының бойында 40 жолаушысымен 11 автокөлік қалған. Құтқарушылар техниканы жолдың тазартылған бөлігіне шығарды.
Абырой болғанда, жолда қалғандардың бәрі де дін аман.
