Қазақстанда бірқатар азық-түліктердің бағасы қымбаттады
АСТАНА. ҚазАқпарат - Қазақстанда бірқатар азық-түлік тауары құнның артуы байқалды. Бұл туралы бүгін ҚР Президенті жанындағы Орталық коммуникациялар қызметінде өткен брифингте ҚР Ұлттық экономика министрлігі Статистика комитетінің төрағасы Әлихан Смайылов мәлім етті.
«Толықтай алғанда, бізде жыл басынан бері баға 4,9 пайызға көтерілді. Бұл тұтынушылық себетін толықтай алғандағы жайт. Ал өздеріңіз де білетіндей, тұтынушылық себетіне азық-түлік тауарларымен қатар, азық-түліктік емес тауарлар, ақылы қызметтер кіреді. Дегенмен, бірқатар азық-түлік тауары, бірінші кезекте жеміс-жиектер мен көкөністердің бағасы басқа тауарлар мен қызметтерге қарағанда біршама қымбаттады. Ал кейбірі, мәселен, қияр мен қызанақ бағасы төмендеді», - деді комитет басшысы БАҚ өкілдерінің сауалына орай.
Оның атап өтуінше, ағымдағы жылдың 7 айында республикадағы инфляция 4,9 пайызды құраған.
«Соңғы 7 айдың ішінде пияз - 72, сәбіз - 65, картоп - 45, қант - 22, қызылша - 21 пайызға қымбаттады», - деді Ә.Смайылов.
