Қазақстанда біз өзіміздің және ұрпақтарымыздың Отанына ие болдық - «Вайнах» этномәдени орталығы

АСТАНА. Шілденің 9-ы. ҚазАқпарат - Мемлекет басшысы Нұрсұлтан Назарбаевтың атына құттықтау хаттар толассыз келіп түсуде. Қазақстан Республикасының ресми тұлғаларының, азаматтарының және ұйымдарының хаттары мен жеделхаттарында олар Елбасын мерейжасымен және елорда күнімен шынайы құттықтайды, деп хабарлады ҚР Президентінің баспасөз қызметі.

Президент поштасында Астанадан Қазақстан Республикасы Парламенті бірінші шақырылымының депутаттары Рысты Жұмабековадан, Лилия Мусинадан, Роза Қуанышбаевадан құттықтаулар бар.

Астана қаласындағы «Вайнах» этномәдени орталығы» қоғамдық бірлестігінің мүшелері былай деп жазады: «Біз, шешендер мен ингуштар Сіздің ұлттық саясатыңызды белсенді қолдаймыз, өйткені Қазақстан біздер үшін тұрғылықты жер ғана емес, жаппай қуғын-сүргін кезінде біз осында өзіміз және ұрпақтарымыз үшін Отанымызды таптық».

«Аса құрметті Нұрсұлтан Әбішұлы, Сізді туған күніңізбен және Астана күнімен құттықтаймыз. Сізге халықтың игілігі үшін ұзақ жылдар президент болуыңызға тілектеспіз, - деп жазады Батыс Қазақстан облысының Зеленов ауданындағы қарттар мен мүгедектер үйінде тұратын Зинаида Зимина. - Сізге қарттарға ұдайы қамқорлық жасап, зор көңіл бөліп отырғаныңыз үшін рахмет».

Келесі хат та Батыс Қазақстан облысының Шыңғырлау интернат-үйінде тұратын зейнеткерлер Мариям Ғалиевадан, Мария Добрицовадан, Бақыт Ізтілеуовадан, Александр Костюктен және Бақтыбай Елеусізовтен келген.

Қазақстан католик епископтары конференциясының төрағасы, архиепископ, Астана митрополиті Томаш Пэта былай деп жазады: «Сізге шын жүректен шыққан құттықтауымды жолдай отырып, Сізге және бүкіл елге Рим Папасы Иоанн Павел ІІ-нің 2001 жылы Сіздің қабылдауыңызға және Өзіңізге ризашылықпен айтқан: «Қазақстан, Сені Тәңірі қолдасын!» деген мінәжатын айтқым келеді».