Қазақстанда электр тауарлары арзандады
АСТАНА. KAZINFORM- Қазақстанда 2026 жылғы сәуір айында көтерме сауда нарығында бірқатар тауар санаттары бойынша бағаның өсуі де, төмендеуі де тіркелді.
Ұлттық статистика деректеріне сәйкес, көтерме бағаның жалпы индексі 2025 жылғы сәуірмен салыстырғанда 110,3%, ал 2025 жылғы желтоқсанмен салыстырғанда 107,6% болды.
Бағаның төмендеуі
Электр тұрмыстық тауарлар мен радиоаппаратура сегментінде бағаның төмендеуі байқалды. Бұл санаттағы индекс 2025 жылғы сәуір деңгейіне шаққанда 93,8%-ды құрап, техника бағасының көтерме нарықта арзандағанын көрсетті.
Баға өскен негізгі санаттар
Қалған сегменттерде баға өсімі тіркелді.
Азық-түлік тауарлары ішінде ет және ет өнімдері 15,1%-ға, сүт өнімдері 15,9%-ға, қант пен кондитерлік өнімдер 14,7%-ға қымбаттады.
Жанармай бағасы да өсті. Бұл сегменттегі индекс 114,6%-ды құрады. Бензин 17,8%-ға, сұйытылған газ 25,3%-ға қымбаттаған.
Цемент бағасы 18,6%-ға, бетон және гипс өнімдері 3%-ға өсті.
Көтерме бағаның ең жоғары өсімі Ақтөбе облысында тіркелді - 148,7%.
Одан кейінгі орындарда:
– Ұлытау облысы - 113,6%;
– Батыс Қазақстан облысы - 112,6%;
– Шымкент - 110,3%;
– Астана - 107,3%;
– Алматы - 106,3%.
Орташа көтерме бағалар:
– тауық еті - 1 377 теңге/кг;
– шұжық және шұжықша - 2 410 теңге/кг;
- сүт - 599 теңге/л;
– қаймақ - 2 312 теңге/кг;
– сары май - 5 100 теңге/кг;
– ірімшік - 4 384 теңге/кг;
– күнбағыс майы - 850 теңге/л;
–ұн - 280 теңге/кг;
– күріш - 469 теңге/кг;
–қант - 416 теңге/кг;
– шай - 4 412 теңге/кг;
– ауыз су - 276 теңге/л;
– дизель отыны - 368 008 теңге/т;
– сұйытылған газ - 122 742 теңге/т.
Айта кетейік, азық-түлік бағасын енді жасанды интеллект бақылайды.
