Қазақстанда қант диабетіне шалдыққан науқастарға инсулин сорғысы терапиясы пайдасын тигізіп келеді - Л.Даниярова
АСТАНА. ҚазАқпарат - Қазақстанда 1-дəрежелі диабетке шалдыққан науқастарды емдеу үшін помпалы терапия əдісі тиімді қолданылып келеді. Бұл туралы бүгін «Қазақстандағы қант диабетін емдеуге арналған инновациялық медициналық технологиялар мен емдеу әдістері: инсулин сорғысы терапиясын ендіруге арналған мемлекеттік жоба" тақырыбында өткен кездесу барысында Денсаулық сақтау жəне əлеуметтік даму министрлігінің бас эндокринолог дəрігері Лаура Даниярова мəлім етті.
"Бірнеше жыл бұрын жасы 18-ге толған, бірақ тегін дəрі-дəрмек берілмейтін жастардың халы не болмақ деген сұрақ туындады. Немесе қант диабетіне шалдыққан жасы 25-тен асқан, отызға таяған адамдардың халы не болмақ? Міне, осы мəселені шешу үшін біз инсулин салу терапиясын қолға алдық. Əуел баста жас аралығы 24-25-тегі адамдарға инсулин салдық, осылайша өте жақсы нəтижелерге қол жеткіздік", - дейді ол.
Оның айтуынша, балаларға арналған инсулинді помпа (сорғы) терапиясы жөніндегі бірегей жоба Қазақстанда 2011 жылы басталған. Жобаның мақсаты - диабеттің 1-ші түріне шалдыққан 1 жастан бастап 18 жасқа дейінгі аралықтағы балаларды қанға инсулинді автоматты түрде жіберетін арнайы сорғылармен қамтамасыз ету.
Айта кетейік, дəрігерлердің бүгінгі кездесуін ұйымдастырған инсулин сорғыларын өндіретін «Медтроник Би Ви» компаниясы.
