Қазақстанда қажылыққа виза алу жеңілдейді

НҰР-СҰЛТАН. ҚазАқпарат - Сауд Арабия билігі биылғы қажылыққа виза алу жолын оңтайландырды. Әлемнің әр түкпірінен баратын азаматтар енді қажылық визасын электронды жүйе арқылы алады. Бұл туралы ҚазАқпарат Қазақстан мұсылмандары діни басқармасына сілтеме жасап хабарлайды.

Аталған жүйе Рамазан айында тәжірибе ретінде енгізілген болатын. Нәтижесінде ұмраға келушілер саны 30 пайызға артқан.

Өйткені әлемнің кейбір елдерінде Корольдіктің консулдық қызмет көрсету орталықтарының болмауының себебінен қиындықтар болатын. Осыған орай Сауд Арабияның Қажылық және Ұмра мен Сыртқы істер министрлігі бірлесіп осы бастаманы қолға алған.

«Биылдан бастап елімізден баратын барлық қажылар осы жүйені қолданады. Мұның ұтымды тұсы көп. Енді Қажылық-2019 маусымына отандастарымызға қызмет ұсынып отырған еліміздегі Қажылықпен айналысуға қабілетті деп танылған турфирмалар парызын өтеушілердің визасын Нұр-Сұлтан қаласындағы Сауд Арабиясының елшілігіне төлқұжат ұсынбай-ақ электронды жүйе арқылы рәсімдей алады. Бұған дейін виза алудың уақыты бірнеше күнге созылса, қазір бір сағатта дайын болады. Осындай электронды виза беру үдерісіне көшкен Сауд Арабиясы Таяу Шығыс аймағындағы Үкіметтік электронды қызметті қолға алған алғашқы ел. Мұндай өзгеріс тіпті біздегі қажылық компаниялары үшін де тиімді екенін айтқым келеді» дейді ҚМДБ Қажылық бөлімінің меңгерушісі Жанділла Бекжігітов.

Айта кетейік бұған дейін парызын өтеушілердің құжаттары әр облыстан жиналып, Нұр-Сұлтан қаласына жеткізілетін. Енді әрбір қажылық фирмалары өз кеңсесінен қажетті құжаттарды рәсімдеп, виза алудың жеңіл түріне қол жеткізбек.